Gerolde vleisbrood met tong, feta en spinasie

Huisgenoot


Berei vanaand vir die gesin ’n stylvolle ete voor.

Genoeg vir 6 mense
Bereiding: 15 min.
Gaarmaak: 1 uur 15 min.

1 kg maer beesmaalvleis
3 knoffelhuisies, fyn gedruk
’n hand vol pietersielie, gekap
2 eiers
180 ml (¾ k) broodkrummels
sout en peper
100 g gaar tong, gekap
200 g feta, gekrummel
2 groot hande vol spinasieblare
500 g gebottelde pastasous

Voorverhit die oond tot 180 °C. Plaas ’n groot vel foeilie op ’n werkoppervlak.
1. Voeg die maalvleis, knoffel, pietersielie, eiers, broodkrummels, sout en peper saam in ’n groot bak. Meng goed met jou hande.
2. Keer die maalvleismengsel op die foelie uit en vorm in ’n groot, dik reghoek. Sprei die bolaag van tong, kaas en spinasie oor die mengsel uit, maar los 2 cm om die rand van die reghoek sonder bolaag.
3. Vat die lang kant van die foelie en rol die vleisbrood styf van jou af weg terwyl jy algaande die kaas en spinasie invou. Trek die foelie na jou toe terwyl jy rol. Verseël die punte van die maalvleis sodat die vulsel nie uitlek nie. Vou die hele vleisbrood in foelie toe en verkoel 1 uur.
4. Plaas op ’n bakplaat, bedek en bak 1 uur. Maak dan die foelie oop en giet die pastasous oor die vleisbrood. Bak nog 15 min. onbedek. Sit voor saam met fyn aartappel en slaai.

Deur Carmen Petersen
Gestileer deur Hope Malau
Foto’s: Megan Miller