Vier mengeldrankies waarmee jy jouself kan bederf op Oujaarsaand!

Dis daai tyd van die jaar wat jy net wil terugsit en ontspan en die nuwe jaar op ‘n hoë noot inlyf. Maak hierdie lekker, maklike mengeldrankies en bederf jouself vir oulaas in die oujaar!

Sauvignon sangria

Dié sauvignon-sangria is ’n verfrissende nuwe weergawe van ’n klassieke Spaanse gunsteling.

3 x 750 ml sauvignon blanc of pienk wyn
1 liter bosbessiesap
10 jenewerbessies
5 steranyse
3 kaneelstokke
skil van 1 suurlemoen
2 suurlemoene, in kwarte gesny hand vol kruisement ysblokkies, opsioneel
Meng alles in ’n bak. Giet dit in ’n glasbeker en geniet dit.

Pimm’s met aarbeie

Bestanddele:

80 ml Pimm’s
15 ml suurlemoensap
aarbeie en appel, in klein blokkies gesny
kruisementblaartjies
limonade en sodawater

Metode:

Plaas die Pimm’s en sap in ’n beker.
Voeg die vrugte en heelwat kruisementblaartjies by en verkoel tot net voor opdiening.
Vul aan met limonade en sodawater na smaak en voeg ys by.

Genoeg vir 6 mense.

Blog: Die perfekte caipirinha

Dis ideaal vir ’n partytjie, want die bestanddele is relatief goedkoop; ’n sak lemmetjies, suiker, ys en ’n bottel cachaça of wodka kan ongeveer 10 tot 14 caipirinhas maak. Cachaça is ’n alkohol soos ons “cane spirit”, maar ek vind wodka is sagter op die tong. As jy wodka verkies, soos ek, word dit ’n caipiroska genoem.

Stap 1: Sny die lemmetjies in die lengte deur om kwarte te vorm. Sny die wit van die lemmetjie, waaraan die pitte gewoonlik vas is, af. Dit help die lemmetjiesap om makliker uit te vloei en hou die bitterheid uit jou drankie.

Stap 2: Gooi die kwarte (omtrent een tot twee lemmetjies per drankie, afhangende van hoe sappig die lemmetjies is) in ’n mengbakkie en gooi ’n eetlepel suiker per drankie by. Pers dit fyn met ’n stamper sodat die suiker en lemmetjiesap meng.

Stap 3: Gooi die lemmetjie-en-suiker-mengsel in ’n glas saam met die skille van die kwarte. Jy kan elke glas ’n derde vol gooi met hierdie mengsel. Gooi dan genoeg ys in dat die watervlak styg tot ongeveer half vol, of selfs twee derdes vol. (Gebruik kort glase, soos dié vir whisky.)

Stap 4: Maak die res van die glas vol met wodka of cachaça. As jy voel dit is ’n bietjie sterk, kan jy sodawater, gewone water of nog ys bygooi.

Geniet! Of, soos die Brasiliane sê: “Saúde!”

Wenk Lemmetjies is goedkoop in Brasilië, maar kan baie duur wees in Suid-Afrika en jy kan min of meer dieselfde smaak kry met ’n gewone suurlemoen. Die Brasiliane gebruik ook nie net lemmetjies nie; hulle maak met enige vrug ’n caipirinha. Aarbeie, pynappel, kiwi en grenadella is die gewildste variasies. Ek hou veral van die aarbei-caipiroskas.

– Dalena Theron



dalena2

Suurlemoen-ystee

Raak ontslae van gemorskos by snoepies; gee ons kinders gesonde kos om van te kies, het ouers gevra. Ons het geluister.

Rooibos-ystee is vol antioksidante en die suurlemoen verskaf ’n verfrissende geur. Dis ideaal vir die warmer weer wat voorlê.

Maak 5 liter (20 x 240 ml); Bereiding: 10 minute; Koste: 67c per glasie; Verpakking: plastiekglasies met deksels

5 liter kookwater; 20 rooibosteesakkies; 200-300 ml bruinsuiker; 225 ml suurlemoensap, verkieslik vars uitgedruk

Laat trek die sakkies in die kookwater tot dit sterk is. Dreineer en roer die suiker by. Laat dit afkoel en roer die suurlemoensap by. Verkoel tot dit benodig word.