Speklekker!

quichemain


 PROMOSIE

Vyf heerlike spekresepte om jou te inspireer om in te skryf vir Eskort se 100 Recipes for 100 Years-kompetisie.

Spekvleis-en-sampioenpasta

Supermaklik en vinnig is nog ’n naam vir hierdie maaltyd.

Genoeg vir 4 tot 6 mense

Bereiding: 5 min.

Gaarmaak: 15 min.

300 g pasta

15 ml (1 e) olie

80 g botter

1 ui, gekap

250 g spekvleis, gekap

250 g sampioene

300 ml room

’n hand vol parmesaankaas, gerasper
sout en peper

1. Kook die pasta in ’n groot pot soutwater volgens die aanwysings op die verpakking. Dreineer goed.
2. Verhit intussen ’n pan oor matige hitte. Voeg die olie, botter, ui, spekvleis en sampioene by. Kook terwyl jy roer 5 min. of tot die spekvleis bros is.
3. Voeg die room by en laat prut 2 min. of tot effens verdik. Voeg die pasta by en strooi die parmesaan oor. Roer deur. Geur met die sout en peper.

Deur Hope Malau

Foto: Megan Miller

Die beste spekvleis-toebroodjie

Hierdie indrukwekkende toebroodjie kan jy sommer vinnig vir middagete aanmekaarslaan.

Genoeg vir 2
Bereiding: 10 min.
Gaarmaak: 2 min.

1 baguette
250 g strepiespek, gebraai
roket vir voorsit
3 eiers, gebraai

SALSA
2 tamaties, gekap
4 sprietuie, gekap
’n hand vol koljander, gekap
2 rooi brandrissies, gekap
15 ml (1 e) olyfolie
15 ml (1 e) rooiwynasyn
sout en peper

Sny die hele baguette horisontaal deur. Bedek met die spekvleis, roket en eiers en sny deur vir voorsit

SALSA
Meng die salsabestanddele in ’n mengbak en sit voor as bykos saam met die toebroodjie.

Deur Hope Malau
Foto: Megan Miller

Spek-en-kaasbrood

Genoeg vir 4-6 mense
Bereiding: 30 minute
Gaarmaaktyd: sowat 1 uur
Staantyd: 30 minute

1 kg gekoopte brooddeeg
1 pakkie (80 g) wit uiesoppoeier 250 g spekvleis, gesnipper en gebraai
375 ml (1½ k) room
300 ml cheddarkaas, gerasper

Verhit die oond tot 180° C.
Spuit ’n oondbak met kossproei.

1. Vorm die deeg in balle en pak dit styf teen mekaar in die bak. Laat 30 minute staan om te rys.
2. Meng die uiesop, spek en room. Giet oor die deeg en sprinkel die kaas oor.
3. Bak sowat 30-40 minute of tot gaar en goudbruin.

Kaserige oondhoender met spek

WENK Vlek die hoenderfilette en stop met die spekvleis. Rol in die krummels en braai effens voor jy dit in die oond plaas.

Genoeg vir 6 mense
Bereiding: 20 minute
Gaarmaaktyd: 30 minute

8 hoenderborsfilette
sout en peper
500 ml (2 k) koekmeel
3 eiers, geklits
500 ml (2 k) fyn droë broodkrummels
250 g spekvleis, in stukkies gesny
250 g sampioene
250 ml (1 k) room
125 ml (½ k) gerasperde
bloukaas of 250 ml (1 k)
gerasperde sterk cheddarkaas
slaai vir voorsit

Voorverhit die oond tot 180 °C. Smeer ’n oondbak.

1. Geur die hoenderborsies met sout en peper en rol in meel.
2. Doop in die geklitste eier en rol dan in broodkrummels. Pak in die oondbak.
3. Braai die spek tot gaar, voeg die sampioene by en braai tot gaar.
4. Voeg die room by en giet oor die hoender in die pan.
5. Sprinkel die kase oor, bedek en bak sowat 30 minute tot die hoender sag en gaar is. Verwyder die bedekking en bak tot bruin.
6. Sit voor met slaai.

Spekvleis-quiche

1 rol (400 g) skilferkorsdeeg
4 eiers
80-125 ml (1/3 -½ k) volroommelk
sout en peper
250 ml (1 k) sterk cheddarkaas, gerasper
250 g repiespek
ui- of parmesaankaassprinkels

Voorverhit die oond tot 190 °C.

1. Voer ’n tertpan van 20 cm met die deeg uit en verkoel.
2. Klits die eiers en melk saam. Geur goed met sout en peper.
3. Sprinkel die kaas in die tertpan.
4. Giet die eiermengsel oor. Pak die spekvleisrepies bo-op en rond af met die sprinkels.
5. Bak 45 minute tot gaar. Sit voor met slaai.

WENKE
1. Vervang die skilferkors met filodeeg.
2. Maak jou eie broskors: Verwerk 375 ml meel en 125 g koue botter tot dit soos broodkrummels lyk. Meng 1 eiergeel en 25 ml (5 t) yswater, giet by en verwerk die mengsel tot dit net bind. Vorm in ’n bol, verkoel en rol uit.

Eskort, Life’s Delicious.

Wen met Eskort

Daar is geen twyfel nie: As jy vark eet, laat spek tien teen een jou mond water. Dink net aan die verskil wat ’n stukkie spek maak op ’n burger.

En wat is spek-en-eiers op ’n Sondagoggend sonder spek? Hier is vyf van Huisgenoot se gunsteling-spekresepte wat jou moontlik sal inspireer om in te skryf vir Eskort se kompetisie 100 Recipes for 100 Years.

Jy wen dalk R2 000! En daarby kry jy die kans om jou resep te sien in Eskort se eeufeesresepteboek.

KLIK HIER as jy dalk R2 000 kontant wil wen én jou resep en die storie daaragter in Eskort se eeufeesresepteboek wil sien.

As jou resep en storie gekies word, sal dit saam met die ander wenners in Eskort se eeufeesresepteboek verskyn.

Vyf wenners sal uit Huisgenoot se inskrywings gekies word, sowel as vyf wenners elk uit die inskrywings wat van Huisgenoot se susterstydskrifte, YOU en Drum, ontvang word.

KLIK HIER vir reëls, bepalings en voorwaardes. Inskrywings sluit op 24 Mei om 17:00.