Moenie dat daai rietskraal lyfie jou flous nie – hierdie blondine kan ’n stewige bord kos wegsit as sy die dag wil.
Ons het iewers ’n voëltjie hoor fluit die sanger en aktrise Sorina Erasmus, alias die Flooze van 7de Laan-faam, kan ’n paar lipleklekker geregte aanmekaarslaan.
Toe besluit ons: Sorina en die Flooze moet albei hul gunsteling-geregte met ons deel. Njammies!
‘‘Dis so ietsie van Flooze en Sorina,’’ sê manlief Braam Riekert (35), wat ook vandag hier in die Kaap is. Hy noem himself haar MM, net so in hoofletters. ‘‘Dit staan vir man en manager,’’ lag die donkerkopman met wie sy twee jaar gelede getrou het.
Kom krap die Flooze hul lewe soms deurmekaar?
‘‘Sy is al so deel van ons lewe en omdat ons nog nie kinders het nie, is sy ons baba. Die Flooze hou ons 24 uur per dag besig.
Ek glo elkeen van ons het tog ’n stukkie Flooze in ons,’’ laat hy hoor.
Selfs vandag op pad na ons kookplek, ’n ateljee in Soutrivier, Kaapstad, het die Flooze die koppe laat draai. ‘‘Van kassiere in die winkels en die vrou wat die eiers by die hotel bak tot sakemense ken die Flooze,’’ lag Braam.
En ja, dis waar, hy en Sorina is regte smulpape. Die Flooze ook, al is sy vol nonsens oor sekere upstairs-goed soos daai duur rooiwyn, vonkelwyn en fênsie tamaties waaroor Sorina gaande is.
‘‘Ons hou van lekker kos en goeie wyn en sit graag by gesellige etes saam met familie of vriende om die tafel en kuier,’’ vertel die wilgerlatblondine en stap na die stoof se kant.
Braam is die avontuurlustigste eter van die twee.
‘‘Hy het al selfs paling geëet,’’ laat hoor Sorina en trek haar gesig op ’n plooi.
Lees die volledige artikel in die lente-uitgawe van Tempo - en hier is een van haar resepte:
RESEP: ROCK(ET) EN ROLL
“Dit is ’n interessante ligte ete en ek het een oggend amper my vingers saam opgeeet van pure lekkerte by die Nantes-gastehuis in die Paarl,” vertel Sorina.
Die basis van die resep is ’n Franse roosterbrood en dis die maklikste resep wat jy kan kry. Die gasvrou se naam is Sarina en daarom is hierdie gereg se ander naam ‘‘Sorina se Franse Afrikaanse Sarina’’.
8 eiers
4-6 dik snye witbrood
botter, vir braai
12 repe spekvleis
60 g roket
½ pak (50 g) gevlokte amandels, gerooster
30 ml pampoenpitte
45 ml balsemieke stroop
30 ml heuning
strooisuiker
Klits die eiers en week die brood daarin. Verhit die botter in ’n pan en braai die brood tot deurgaar en goudbruin. Braai die spek bros en breek in growwe stukke. Strooi eenvoudig roket, amandels en pampoenpitte saam met die spek op die brood (jy kan die brood in vingers sny) en rond af met balsemieke stroop, heuning en strooisuiker bo-oor.
• Lewer vier porsies.
Meer van Sorina se resepte verskyn in die lente-uitgawe van Tempo!