Musiek loop in hul are. Bobby van Jaarsveld, ousus Karlien en ma Ronél Brink.
Hy’t die looks, die lyf, natuurlik die stem... En sy nuwe album, Net vir Jou, verkoop dat dit klap. Jy sou dus nie verbaas wees as Bobby van Jaarsveld dalk net ’n effense houdinkie aan hom het nie.
Maar nee, hier in sy ma se huis in Hartbeespoort in Noordwes is die 22-jarige sanger net nog een van die kinders.
En een met ’n rusper se aptyt. Met die instapslag groet hy vriendelik, gryp ’n stuk droëwors en plak homself op die rusbank neer. Kort daarna spring hy op en eet ’n handvol Milo-ontbytkos.
‘‘Ek is nie ’n skynheilige mens nie,’’ sê hy met daardie ondeunde seunsglimlag wat al soveel knieë laat knak het. Hy voeg vinnig by: ‘‘Dis soms moeilik om in die musiekbedryf ’n normale, gebalanseerde lewe te lei. Ek val, soos enigiemand sou, maar dan staan ek weer sterker op. My geloof help my daarmee.’’
Pa Bob en ma Ronél Brink is 15 jaar gelede al geskei en het albei weer getrou, maar hulle is steeds hegte vriende, en Bob het ook vandag kom inloer. Hy woon deesdae op Witbank.
‘‘Die belangrikste dinge wat ek my kinders wou leer, is nederigheid en ’n Christelike grondslag,’’ sê hy. Jy sien dit letterlik aan Bobby en ousus Karlien (24) – albei het kruise op hul gewrigte laat tatoeëer ter bevestiging van hul geloof, al wil Bobby nou syne laat verwyder “oor mens nie ’n simbool moet aanbid nie, maar die lewende Here”, sê hy.
Ronél en Bob kuier veral ná Bobby en Karlien se vertonings saam, want Karlien sing ook deesdae solo nadat sy lank in rockbands soos Die Melktert Kommissie kitaar gespeel het.
Musiek is beslis in Bobby en Karlien se gene, want Ma en Pa het op skool saam in ’n groep gespeel en Ronél het in 1989 as solosanger na die halfeindronde van die TV-musiekkompetisie
Debuut deurgedring, in dieselfde jaar dat die Coleske-broers ook deelgeneem en Danie Botha gewen het.
Die hele gesin – van Bob tot kleinsus Cara – speel kitaar. Deesdae bestuur Ronél haar kinders se musiekloopbane.
Lees méér in die herfs-uitgawe van Tempo waarin ook meer foto’s van die aantreklike Van Jaarsvelds verskyn.
Op die internet:
www.bobbyvanjaarsveld.co.za
Facebook-groep