So opwindend soos die vermaakwêreld is, net so wispelturig kan dit wees – daarom het van ons bekende sangers besluit om ook in ander belange te belê. Kurt Darren het talle sakebelange en is ook 'n rugbybaas... hy vertel meer.
Hy is en sal altyd ’n Blou Bul-ondersteuner bly, maar toe Kurt Darren die kans kry om ’n aandeelhouer in Boland Rugby te word, het hy dit aangegryp.
“’n Vriend, Renier Swart, het my genader en ek het toe saam met Victor Matfield en die Springbokafriger Peter de Villiers ’n aandeel van 50 persent in Boland Rugby gekoop. Dit was ’n maklike besluit, want ek het nog altyd geweet van ons land se beste rugbyspelers kom uit die Boland. Ons het groot drome en een van die dinge wat ons wil doen, is om Boland-spelers in die Boland te hou.’’
Kurt glo daar is baie ooreenkomste tussen Blou Bul-rugby en Boland-rugby. “Die kultuur is dieselfde. Dis mense wat passievol is oor rugby. Ek is baie lief vir die Boland – die natuurskoon, die wynlande en die mense.”
Hy het al ’n hele paar Boland-wedstryde bygewoon, en by een van die wedstryde vroeër vanjaar is ’n direkteursbaadjie op die veld aan hom oorhandig. “Ek gaan probeer om soveel wedstryde by te woon as wat ek kan,” sê hy.
Enigiemand wat Kurt ken, weet hy’s ’n ou met ’n slim sakebrein. Hy maak goeie beleggings en luister na die raad van sakemanne soos sy goeie vriend Whitey Basson, grootbaas van Shoprite.
“Ek is gelukkig dat ek mense soos Whitey in my lewe het. Ek is baie lief vir sing, maar ek wil nie vir altyd toer en vyf aande per week sing nie. Eendag sal ek ’n pa wees met kinders wat moet skoolgaan en dan sal ek meer by die huis wil wees. Daarom is dit belangrik om iets te hê behalwe sing.”
Lees in die lente-uitgawe van Tempo hoe ander kunstenaars ook die pot aan die kook hou!