MET haar lang bene en blonde hare is sy net so aantreklik soos haar broer. En wanneer sy ’n mikrofoon nadertrek en begin sing, besef jy Karlien van Jaarsveld hoef geen tree vir kleinboet Bobby terug te staan nie.
Haar debuutalbum, As die Gordyn Val, is pas uitgereik en musiekliefhebbers sal dadelik op haar heserige, sielvolle stem verlief raak.
Sy was voorheen lid van die rockgroep Revolusie, maar het teen die einde van 2008 daaruit bedank.
‘‘Ek het my hart vir die Here gegee kort nadat Revolusie se eerste CD uitgereik is. Soveel mense was in daardie stadium teleurgesteld in my, want ek het my soms met verkeerde dinge opgehou,’’ erken Karlien, ’n Pretorianer. ‘‘Ek het toe besluit om my lewe te verander.’’
’n Maand nadat sy besluit het om haar eie rigting in te slaan en haar op popmusiek toe te spits, het Mozi Records vir haar ’n platekontrak aangebied.
Sy het amper al die liedjies op haar album self geskryf en sê sy kry partykeer op die vreemdste oomblikke inspirasie. ‘‘Mense dink soms ek is ongeskik, want ek sal sommer in ’n restaurant my foon uitpluk en ’n liriek of wysie opneem om te keer dat ek dit vergeet.’’
Al is haar gunsteling-liedjie op haar album Rooi Ligte, het sy ook ’n sagte plekkie vir die album se titelsnit. ‘‘Ek het begin huil toe ek dit die eerste keer sing, want dis ’n emosionele liedjie.’’
Karlien sê sy is nie skaam om by Bobby vir raad aan te klop nie – hy het ’n goeie oor vir ’n treffer. Sy speel haar liedjies altyd eerste vir hom.
Maar hoe het dit gebeur dat boet en sus albei in die musiekwêreld beland het? “Ek het dit nooit as kind oorweeg om ’n sanger te word nie, maar ek en Bobby moes gereeld voor die res van die familie sing. Dan het hulle vir ons leë koeldrankbottels gegee en ons het dit by die winkel vir lekkergoed gaan omruil,’’ lag sy.
Wys jou net: Die Van Jaarsvelds se sangtalent én sakevernuf lê sowaar in hul gene!
BESPREKINGS: Bel 082-907-5203
PLATEMAATSKAPPY: Mozi Records
VERSPREIDING: Iris
VERJAARDAG: 21 Desember
WEN ’N CD
Vyf lesers kan Karlien se CD wen. SMS die antwoord, jou naam en adres voor 26 Augustus om 17:00 na 34922. Elke SMS kos R2. Vraag: Wie is Karlien se broer? Die borg is verantwoordelik vir die versending van die pryse aan die wenners binne ’n redelike tyd.