Hy het dikmond agter in die motor gesit, daardie dag in 1986 toe hy saam met sy ma, suster en twee broers die klein dorpie in die Oos-Kaap binnegery het.
Welkom/ Welcome in Lady Grey, het ’n groot bord langs die pad hulle begroet. Maar Jay du Plessis het allesbehalwe welkom gevoel.
Deur die motorruit het hy die skool, ’n kafee en ’n winkeltjie gesien, ’n vulstasie en ’n paar huise. Stofstrate het dieper die dorp ingestrek.
Hier eindig my lewe nou, het die negejarige knaap treurig gedink. Want deur die motorruit het Lady Grey heeltemal anders gelyk as die heelwat groter Vrystaatse dorp Harrismith waar hy die vorige jaar as st. 1-seun ’n klomp pelle gehad het.
‘‘Min het ek toe geweet dit was die begin van ’n ongelooflike kinderlewe op ’n ongelooflike dorp – ’n plek waar mense mekaar nog help,’’ vertel Jay (33) vandag.
En hier sou die bekende lid van die groep Eden en deesdae ook solokunstenaar se liefde vir musiek ontkiem, ‘‘alles te danke aan my musiekonderwyser, juffrou Ronél Henning’’.