Hy was die mees gehate man op Santa Carolina, want hy het sy mede-deelnemers gedurig die hoenders in gemaak. Van die oomblik dat Craig Jacobs in Mosambiek aangeland het, het hy Survivor se beterweter geword, oor almal baasgespeel en die leier van die groep probeer wees.
Die eertydse glansjoernalis, deesdae mode-man, het toe net nege dae oorleef voor sy stam, Chibudu, hom eenparig die stewel in die sitvlak laat voel het.
En wat dink Craig, hoe lyk hy vir homself op TV? ‘‘Ek het gedink dis ongelooflik snaaks,’’ sê hy. ‘‘Dit is immers werklikheidstelevisie en vanselfsprekend word dinge so geredigeer om karakters te skep. Ek was net myself, nie ’n ander mens voor die kameras nie.”
Is hy dan in die regte lewe ook so baasspelerig? “Ek is ’n vasbeslote mens, daarom kan ek dalk ietwat baasspelerig voorkom. Ek het sterk menings.’’
Craig (35), die eienaar van die geleentheidsonderneming Sty(list)A en kreatiewe direkteur van die klerehandelsmerk Fundudzi, erken hy was ’n bietjie naïef. As hy alles kon oordoen, sou hy hom ingehou het.
Maar die noodlot het ’n stok in die wiel gesteek toe hy en Kaseran Pillay kamtig uitgestem is, maar toe gevra is om die twee spanne, Chibudu en Timbila, te kies.
Al het hy ’n band met GiGi gevorm, is sy hoop op ’n alliansie gou verydel toe Christina Storm en Jub Jub kort ná mekaar die pad gevat het.
En terwyl sy stammaats gesê het hulle het Craig uitgestem omdat hy so lui is, ontken hy die aantyging prontuit.
Kos was ’n groot probleem vir Craig. Weens ’n lewensgevaarlike allergie vir jodium kan hy sekere seekosse nie eet nie.
Survivor was moeilik, ja, maar niks vergeleke met wat hy die laaste paar maande deurgemaak het nie. Sy pa, Denzil, is op 15 Januarie aan leukemie dood, dae voor Survivor op M-Net begin het.
Dit was ’n bedekte seën dat hy ná nege dae uitgestem is, want so kon hy sy pa se sterwenswens bewaarheid en hom terug huis toe bring om sy familie in Durban te besoek.
Lees die volledige artikel in Huisgenoot van 11 Februarie.