Die koerantbaas van die Laan, Neville Meintjies, is uit die veld geslaan toe hy oudkollega Wesley Young in Hillside raakloop.
Die twee het jare gelede saam in die Kaap as joernaliste gewerk en toe kontak verloor, en hier duik Wesley nou weer op, deesdae nogal ’n gerekende sakejoernalis.
En ’n hele klompie sepiekykers was dalk net so verstom om te sien Chris Edwards, wat toe minder as ’n maand tevore nog in Egoli doodgeskiet is, herrys nou as’t ware uit die dood as joernalis in 7de Laan.
Eckard Rabe, deesdae Wesley in 7de Laan, was toe ook die eerste van die Egoli-akteurs wat met die einde van daardie sepie na ’n volgende kon oorstap – en sommer so maklik maklik boonop. “Dit voel asof ek maar net van een bootjie na ’n ander oorklim terwyl jy in dieselfde stroom bly vaar,” vertel die veteraanakteur.
Maar ja, dis lekker om iemand nuuts te kan wees. “Wesley is feitlik Chris se teenpool,” sê hy. “Chris is statig en konserwatief, terwyl Wesley lekker lig op die voete en ’n spontaner karakter is.”
Lees die volledige artikel in die Huisgenoot van 13 Mei 2010.