SY HET haar boer met ’n tweede kans gevang – maar Yolindi du Preez, verloofde van Hennie van Deventer, het toe nie lank ’n plaasmeisie gebly nie…
Die rietskraal vrou maak skaars ’n duikie hier op die rusbank langs die man wat danksy die gewilde TV-reeks Boer Soek ’n Vrou deel van haar lewe geword het.
Buite die venster van hul meenthuis is ’n tuintjie met laventel en ’n suurlemoenboom – baie ver van die uitgestrekte wildplaas waar hulle skaars sewe maande gelede nog gewoon het.
Toe ons laas by die verloofdes gekuier het (Jip, joune vir altyd, 25 Junie 2009), kon Yolindi nie uitgepraat raak oor die lewe as plaasmeisie in Hoedspruit se Bosveld-wêreld nie. Dit was immers hoekom sy vir die kykNET-werklikheidsreeks ingeskryf het: om ’n boer te vang wat haar liefde vir die natuur deel.
Maar amper soos hul liefde in die program met ’n ompad gekom het, moes die paartjie einde verlede jaar ook ’n onverwagse u-draai maak om hulle hier op Middelburg te kom vestig. Nou is Yolindi (42) weer ’n dorpsmeisie, en sy en Hennie (44) werk sy aan sy in ’n winkel hier.
Die resessie het die wildplaas wat hy bestuur het, ’n paar dwarsklappe gegee, verduidelik Hennie. Ál minder oorsese toeriste het bespreek vir die wildbesigtingsingsritte, staptogte en veldoorlewingskursusse wat hy daar op die plaas aangebied het.
Die terugtog na Middelburg, Yolindi se tuisdorp, het toe sommer twee probleme gelyktydig opgelos: Hennie kon sy inkomste aanvul deur by haar familie-onderneming in te val, en boonop is hy nou net 30 minute se ry weg van sy twee dogters in Witbank.
Nie dat die trek maklik was nie, erken die voormalige boer. ‘‘Ons mis die oop ruimtes van die veld baie. Dit was ’n groot aanpassing toe ons einde November hierheen getrek het. Ek dink Yolindi het my buierigheid baie goed hanteer. ’n Ander vrou sou my dalk al in die pad gesteek het…”
Lees die volledige artikel in die Huisgenoot van 17 Junie 2010