Dozi en Esmaré by Skouspel Plus
Ek werk vandag (Maandag) van die huis af – het regtig net 'n bietjie stilte nodig om alles van die naweek te verwerk. Hoe ongelooflik was Skouspel Plus?
Die liedjies draai die een ná die ander deur my kop. Het Sondagoggend toe ek my oë oopmaak net "Barcelona" op my lippe gehad! Én ek begin sommer reeds daarna uitsien om dit alles weer te beleef as Skouspel Plus op M-Net uitgesaai word en die DVD verskyn.
Een van die kameraspanne wat daar was, vra my wat was my hoogtepunt. Onmoontlik om te kies, sê ek. Alles was vir my een GROOT hoogtepunt!
Maar daar is tog dinge wat uitstaan...
Nianell wat opera sing het my verstom - haar en Dozi se Making Whoopee is die sexyste ding wat ek nog ooit op ‘n Skouspel-verhoog gesien het. Rudi en Corlea het my hoendervleis gegee in elkeen van die drie vertonings. Mathys en Laurika het my elke keer in trane gehad. Wat ‘n voorreg om hierdie ikone op ons vertoning te hê!
Kyk, ek is mos die wêreld se grootste Theuns Jordaan-fan, en het voor die tyd verskriklik uitgesien na sy Sprokie vir ‘n Stadskind saam met Bobby en Wynand. Stel jou voor, daardie drie stemme saam op een verhoog? En dit was soooo mooi!
Ek was die meeste van die tweede helfte agter die verhoog om aan te trek en die lippe weer te verf, en het bietjie misgeloop hoe die gehore reageer. Maar, daar was skerms oral agter waar die kunstenaars en produksiespan die vertoning volg - en toe ek vir Corlea, Cheree en Elizma op die skerms sien met Jesus Take the Wheel, het ek net besef: ná soveel jaar van ‘n betreklike droogte aan nuwe Afrikaanse vrouestemme... hier is die toekoms nou saam op die verhoog. Ek moet dadelik vir Andriëtte byvoeg... Dis opwindend om te sien hoe haar verhoogpersoonlikheid ontwikkel het vanaf Idols en haar eerste Skouspel. Daar wag ‘n groot toekoms!
Snotkop het my net ook beïndruk – die mense is mal oor hom! En Emo Adams het amal uit sy hand laat eet en uit hul mae laat lag met sy skreeusnaakse vertolking van Blueberry Hill. Agter die verhoog het al die kunstenaars elke keer bymekaar gekom om hom te kyk. En letterlik gerol van die lag!
Ek praat nou seker bietjie uit my beurt uit, maar ek wens een van ons groot platemaatskappye wil vir Jennifer Jones en Brandon October ordentlike kontrakte aanbied en hul loopbane professioneel bestuur. Hierdie is werklik twee van die grootste talente in Afrikaanse musiek. Hulle is nie sangers nie – hulle is PERFORMERS van wêreldgehalte. Dis kunstenaars soos hulle wat van 'n vertoning soos Skouspel Plus iets spesiaals maak.
Claire Johnston was ‘n openbaring. Die kunstenaars kon nie uitgepraat raak oor hoe lekker dit was om saam met haar te sing nie. Daardie stem, daardie energie op die verhoog! Met Skouspel Plus, wat deur Huisgenoot en YOU aangebied word – en dus in Engels en Afrikaans is omdat ons dit wil onderskei van Skouspel by Sun City – probeer ons Engelse kunstenaars kies wat vir die oorgrote Afrikaanse gehoor sal werk. En geoordeel aan die applous het die Skouspel Plus-gehore haar aan die hart gedruk.
Nou ja toe, ons arme fotograwe is besig om deur die 4 000 foto's te werk wat hulle oor die naweek geneem het. Dis vir my so erg dat ons so min plek daaraan kan afstaan in die volgende week se Huisgenoot. Maar ons laai vir julle hope foto's op die webtuiste volgende week.
Dankie, dankie, dankie! Vir die lesers, die kunstenaars, die ongelooflike produksiespan... Barcelona!
- Esmaré