Dis vieruur Dinsdagmiddag, presies 24 uur ná die ongeluk. Die son mik na die horison, en die rooi aarde, die bosse en bome weerskante van ’n teerpad vol krake hier in Soweto is in ’n goue gloed gehul.
Tekens dat die grubotsing op dié plek gebeur het, is oral te sien. Glasstukke, ’n stuk van ’n buffer en ander verfrommelde motordele, platgedrukte bosse en repe polisieband lê verstrooi hier waar vier seuns gesterf het en twee ernstig beseer is toe twee straatjaers tussen hulle ingeploeg het terwyl hulle van die skool af huis toe gestap het.
Die pad tussen Protea Glen en Protea-Noord is lank, reguit en besig. Taxi’s en motors snel verby en groepe mense – baie van hulle skoolkinders – stap. Die sypaadjie is so smal dat baie in die pad loop, hoewel almal ná gister hiperversigtig is. Ook Katleho Nkomo en Phindile Matlebula, albei gr. 12-leerders aan Tetelo Secondary School.
Hulle moes immers gister die bloedbad aanskou toe die twee motors gebots en die skoolseuns afgemaai het.
Die gewilde rapsanger Jub Jub (29) en sy vriend Themba Tshabalala, bestuurder van ’n drankwinkel en lid van ’n ryk familie, sou die volgende oggend in die hof verskyn. Albei is glo vir dronkbestuur getoets, maar net Themba se alkoholvlak het die wetlike perk oorskry. Spore van dwelms is glo by albei mans gevind.
Jub Jub het verlede maand nog die tonge laat klap toe hy as deelnemer aan Survivor Carolina tou opgegooi en huis toe gegaan het omdat hy ’n uitslag op sy geslagsdele gekry het.
Phindile en Katleho was op pad huis toe in Protea Glen toe hulle die ongeluk sien gebeur. “Dit het baie vinnig gebeur, maar ons ken Jub Jub se motor omdat ons dit so gereeld sien,” vertel Phindile. “Hy het baie vinnig met sy gryserige Mini Cooper in die baan vir aankomende verkeer gery en teen ’n ou in ’n blou Mini Cooper resies gejaag.
“Hy het die blou Mini probeer verbysteek, maar ’n ander motor het van voor af gekom en hy het teen die blou Mini vasgery, en dit het tot in die bos getol. Ons het albei soontoe gehardloop.”
Lees die volledige artikel in die 18 Maart-uitgawe van Huisgenoot.