Nella, regs, saam met haar ma. (Foto: Verskaf)
Dit is soos ’n nagmerrie waaruit sy net nie kan wakker word nie, sê die 22-jarige Nella Coetzer. “Ek weet steeds nie of sy dood is nie.’’
Dit was ’n verskriklike skok toe haar ma se Volkswagen Caravelle verlede Mei gevind is naby Lydenburg waar dit teen ’n berghang afgestort en aan die brand geslaan het. ’n Verkoolde lyk is voor in die bussie aangetref – vermoedelik dié van Petronella Francom van Hazyview.
Maar nou is niks meer seker oor Nella se ma op wie sy so trots was nie. Daar is meer vrae as antwoorde; soveel dinge wat sedert haar ma se “dood’’ gebeur het wat nie sin maak nie. Maar tot die polisie se ondersoek afgehandel is, probeer sy fokus op dit wat sy van haar ma onthou. Sy vertel van Petronella se sagte hart, van haar vrygewigheid.
Die verpletterende oproep het op die Vrydagaand, 22 Mei, gekom. Haar stiefpa, Clint Francom, het eers Nella se kêrel, Andoni Diamondis, op sy selfoon gebel om seker te maak hy is by haar, en toe vir haar.
’n Gedenkdiens is die Vrydag ná die ongeluk gehou en Petronella se oorskot is veras. Sy het snuf in die neus begin kry toe sy die Maandag ná die diens hoor dat haar ma se testament wat vir haar voorsiening maak, glo verdwyn het.
Forensiese speurders het hul eie ondersoek op die ongelukstoneel en op die voertuig gedoen en bevind dit was moontlik nie ’n ongeluk nie, en dat die brand nie vanself ontstaan het nie. Toe Petronella se tandartsrekords vergelyk is met dié van die oorskot in die bussie, is bevind dat dit nie hare is nie, maar vermoedelik dié van ’n kind. Die polisie ondersoek ’n saak van versekeringsbedrog van meer as R13 miljoen – die waarde van sewe polisse wat voor die ongeluk in Petronella se naam uitgeneem is. Die polisse word voorlopig nie uitbetaal nie.
Sy wag nou gespanne vir die uitslag van die polisie-ondersoeke. “Ek kan nie finaal afskeid neem nie. Ek hou steeds vas aan daardie greintjie hoop dat sy dalk nog leef.”
Lees meer hieroor in Huisgenoot van 4 Februarie.