Hy is een van duisende toegewyde ouers wat ook net die beste moontlike pa vir sy kind wil wees, maar hy word pal deur ’n moeilike eks gedwarsboom. Nou, eindelik, bring die nuwe Kinderwet vir Rynard* en vele ander moedelose ouers lig in ’n duister tonnel.
Met die wet nou ten volle van krag, is Rynard, soos baie ander ouers wat nie toesig oor hul kinders het nie, vol hoop op ’n beter toekoms. “Nou kan alle ouers ook hul regte geniet terwyl hulle hul verantwoordelikhede nakom,” sê dié verheugde pa.
Die Suid-Kapenaar, wat nie getroud is met die ma van sy kind nie, vertel van ’n voortdurende stryd om sy seuntjie te sien te kon kry, al sedert sy geboorte net meer as ’n jaar gelede.
“Ek en sy ma het voortdurend vasgesit, al toe sy swanger was. Die probleem is nie dat ek ’n slegte pa of sy ’n slegte ma is nie, maar eerder verskille in hoe ons grootgemaak is.
“Daar is byvoorbeeld probeer om my te verneder, en ek is vals beskuldig. So kon ek toe nie my seun se eerste verjaardag saam vier nie, en hy is nie toegelaat om enige van my familielede te sien nie.”
’n Maatskaplike werker vertel toe sy eks agterkom dat Rynard met ander meisies uitgaan, sou sy “as straf die kind van hom weerhou”.
Sy het al telkens met toegewyde pa’s gewerk wat in trane was omdat hulle kontak geweier is met kinders wat deur ma’s as ’n emosionele speelbal ingespan word, vertel sy.
Geskeide ouers sit dikwels met dieselfde tameletjie, en hoewel die reg reeds aan al hierdie ouers se kant was, was dit so onmoontlik duur om regstappe te doen dat hulle eenvoudig aan die toesighoudende ouer se nukke en grille uitgelewer was.
Dit het nou alles verander. Waar ’n ouer tevore met kwessies oor toesig en toegang tot ’n kind na die hooggeregshof moes gaan, kan hulle nou by die beampte van die kinderhof in hul plaaslike landdroshof aanklop. Dit hoef hulle nie ’n sent te kos as hulle hul saak sonder die hulp van ’n prokureur wil stel nie.
Ook oumas en oupas wat voel hul regte word benadeel, word nou deur die nuwe wet in die posisie gestel om iets daaraan te doen.
“Ons as ongetroude pa’s het reeds ons regte gehad, maar as ’n ma nie wou saamwerk nie, moes jy jou regte deur die hooggeregshof laat afdwing het,’’ sê Rynard. “En so ’n saak kan tot R80 000 kos, geld wat die meeste gewone mense net nie het nie.
“Dus is sake maar laat staan en is ons verder geboelie, en kinders gebruik om die ander ouer se wense te vervul, hoe onregverdig ook al.”
Die nuwe Kinderwet is ná 13 jaar van intensiewe navorsing en konsultasie uiteindelik nou ten volle van krag. Dit bring ’n nuwe bedeling vir kinders waarin hul beste belange deurgaans vooropgestel word, verneem ons van kenners.
Lees meer oor die nuwe Kinderwet in die Huisgenoot van 15 April 2010.