Hy het die oggend voor die badkamer-spieël gestaan en tande borsel ná ’n lang en slapelose nag, en gewroeg oor hoe hy deur die dag gaan kom. Hoe kyk jy die wêreld weer in die oë ná so iets?
’n Dag tevore het die bom in ’n Sondagkoerant gebars: Daar is ’n seksvideo, het Rapport berig, van Joost van der Westhuizen saam met ’n feitlik naakte blondine in ’n pienk deurtrekker. Dit lyk of hulle orale seks het en ’n wit poeier snuif.
Daardie Maandagoggend het die man voor die spieël gewonder: Hoe kry ’n mens dit reg om ná so iets by jou voordeur uit te stap en aan te gaan met jou lewe? Maar toe kyk hy vir homself in die spieël en sê: ‘‘Joost, jy het niks verkeerds gedoen nie. Mense kan jou maar kruisig. Jy weet wat in jou hart aangaan.’’
En so, vertel die gewese Bok-kaptein, het hy ’n rukkie later breëbors met die vyfjarige Jordan en Kylie (2) by die huis uitgestap om hulle oudergewoonte skool toe te vat.
Dit is ’n driftige Joost wat styf langs sy mooi sangervrou in die gesin se luukse huis in Fourways sit. Oral is foto’s van gelukkige tye saam in die gesin se lewe. Al wat verraai dat alles nie pluis is in die Van der Westhuizen-huishouding nie, is die veiligheidswag wat die kinders met arendsoë dophou.
Die glanspaar maak vandag vir die eerste keer hul hart oop oor die wolk wat die afgelope tyd oor hul kop hang. En hulle sê onomwonde hulle is nou nog nader as ooit aan mekaar.
Joost is duidelik keelvol verby oor die bewerings wat gemaak word. Dit is die laaste strooi van drie jaar se teistering en dreigoproepe, sê hy.
So iets wil hulle nooit weer oorhê nie, beaam Amor. Dit was vir seker die moeilikste dag van hul lewe om met die video gekonfronteer te word.
‘‘As hul motief daardie dag was om ons seer te maak, het hulle dit reggekry,’’ voeg Joost by.
Dit is duidelik: Die dinge van die afgelope tyd het hulle tot na aan breekpunt gedryf.