Sy was die baba wat die dokters laat sê het: “Mevrou, ’n aborsie is al uitweg.” Een het selfs van ’n outopsie gepraat, kompleet asof sy reeds dood is.
Toe sy wel gebore is, was sy so groot soos ’n man se hart, maar nog nie so swaar soos ’n blikkie boontjies nie. Maar Hope Samuels van Hawston was toe taaier as wat die dokters gedink het en spoedig was sy ook ’n rekordhouer – op 390 g die kleinste baba wat nog in Suid-Afrika gebore is en oorleef het.
Dit is vier maande later en vandag lê Hope tevrede en wag vir haar tweede voeding van die dag in haar ma se huis. Hope is veel kleiner as wat ’n baba van haar ouderdom behoort te wees. Sy weeg nou net ’n aks meer as 2 kg en dra steeds die kleinste doeke wat daar is.
Nou sê die dokters Hope is gesond. Dit is uitsonderlik vir so ’n jong baba wat op net 27 weke gebore is. Toe haar ma, Robyn, op 20 weke vir ’n sonar gaan, is ontdek ’n plasentagebrek vertraag die baba se groei. Toe gaan spreek sy dr. Monty Brink, ’n ginekoloog by die Constantiaberg Medi-Clinic in Kaapstad.
Monty het haar van haar 24ste week by die huis laat bly en bedrus voorgeskryf. Van 29 September, haar 26ste week, is sy in die kliniek opgeneem. “Ek het die baba steroïede gegee sodat haar longe kon groei, en op 27 weke en vier dae het ek besluit om haar met ’n keisersnee te verlos. Dinge het nie goed gelyk nie, want daar was ’n geweldige afname in die baba se beweging. Teen daardie tyd moes sy al ’n kilogram geweeg het, maar sy was minder as ’n halwe kilogram,’’ sê hy.
Hope is op 2 Oktober verlede jaar met ’n keisersnee in die wêreld gebring. As hy net nog 12 uur gewag het voor hy haar verlos het, sou sy waarskynlik gesterf het, sê Monty. ‘‘Hope is die kleinste baba wat ek nog verlos het wat oorleef het. Sy het letterlik in my handpalm gepas.’’
Lees die volledige artikel in Huisgenoot van 11 Februarie.