Almal se oë is op die ruiter en die sweetvosmerrie. Soos dit ’n wafferse lady en nasionale driegang-saalperdkampioen betaam, kan jy Lady Domain deur ’n ring trek. Haar nek is teruggetrek, ore gespits, stert kiertsregop – sy is die ene houding en sy is net om een rede hier: om te wen!
In die saal straal die ruiter nog meer selfvertroue as die perd uit. Met elke opdrag van Chelsey Cooper draf, stap of galop Lady Domain soos net ’n kampioen kan. En wanneer die skare ná die skouspelagtige driegangklas in applous uitbars, fluister die ruiter saggies in die perd se oor: ‘‘Ons het hulle toe- oë geklop, Lady!’’
Agter die paviljoen slaak ma Anneli Cooper ’n sug van verligting. In al die jare dat sy self aan perdesport deelneem, was sy nog nooit so gespanne nie. En nou stroom die trane oor haar wange.
Chelsey het pas meer as 40 deelnemers by die Suid-Afrikaanse Saalperdkampioenskaps-byeenkoms in Bloemfontein uitgestof en in ’n skouspelagtige vertoning die driegangklas in haar ouderdomsgroep gewen. En dit op ’n blinde perd...
Die beoordelaars het van niks geweet nie. Terwyl Chelsey en Lady optree, het die gerug dat Lady blind is soos ’n veldbrand versprei en die skare het vasgenael na hul vertoning gekyk.
’n Blinde perd mag volgens die reëls glad nie deelneem nie en net ’n handjievol mense het geweet Chelsey is Lady se oë.
So besonders is die verhaal van dié 15-jarige Vrystaatse meisie, haar blinde perd en hul onwrikbare geloof in mekaar dat ’n Hollywood-ateljee nou in die rolprentregte belangstel.
Lees die volledige artikel in die Huisgenoot van 25 Februarie.