Met die titel van sy nuwe album sê Snotkop reguit: ‘‘Francois Henning Was Hier.’’ Want dis amper asof hy die stempel van sy eie identiteit op die CD afdruk en verduidelik: ‘‘Ek kruip nie agter ’n skuilnaam weg nie. Ek is wie ek is en is trots daarop.’’ Hy het besluit dis tyd dat hy sy eie identiteit op ’n album wys, sê hy. ‘‘Dis ’n samevatting van wie ek is en waarvan ek hou. Op skool het kinders met passers hul name op die skoolbanke uitgekrap om hul merk te los. En dis wat ek met my nuwe album doen.’’
Al weet die meeste van sy aanhangers wat sy regte naam is, verskyn dit nou met sy derde Afrikaanse album vir die eerste keer op die CD-omslag. ‘‘Ek kan nie vir ewig Snotkop bly nie, ek kan myself mos nie meer op 45 Snotkop noem nie! Ek moet voortdurend transformeer, dis belangrik dat kunstenaars hulself gereeld reinvent.’’
Maar al sê hy hy bly aan die ontwikkel, sal sy nuwe album aanhangers nie teleurstel nie. Die titelsnit is ’n kragtoer, en daar is oudergewoonte ’n stuitige, onvergeetlike verwerking van ’n bekende liedjie. Suikerbos word in Suikerflossie omskep, en dit is voorwaar ’n hoogtepunt.
‘‘Die meeste van ons tradisionele liedjies is eintlik nogal erg – dit gaan altyd oor ’n gedrink of gedans of gevry! Ek het nie die betekenis van die liedjie verander nie; ek dra dit net op ’n nuwe manier oor . . .’’
Om treffers soos syne te skryf is ’n hengse uitdaging, sê hy. ‘‘Jy moet ’n liedjie skryf wat jou aanhangers ná die vierde luisterslag sal saamsing. Die belangrikste elemente bly ’n sterk melodie, tromme wat pomp, ’n lekker baslyn en tong-in-die-kies-lirieke.’’
Benewens die 12 liedjies op die album, bied die CD ook musiekvideo’s van sy treffers Kry Jou Ass by die Werk, Shut Up en Soen My en Katrien. ’n Gratis PlayStation-speletjie is by 5 000 van die album se uitgereikte eksemplare ingesluit. Dis mos ’n lekker pasella!
WEBTUISTE: www.snotkop.co.za
BESPREKINGS: Kontak Louis by 011- 704-1530 of louis@bse.co.za
PLATEMAATSKAPPY: Next Music
VERSPREIDING: Next Music
VERJAARDAG: 22 Desember
Vyf lesers kan Snotkop se CD wen. SMS die woord SNOTKOP, jou naam, en adres voor 28 Januarie om 17:00 na 34922. Elke SMS kos R2.