Zef verby. Dis hulle – en dis wat hulle nou kits-kultusstatus besorg het tot in Engeland, Europa en Amerika.
Die Antwoord het nog nie ’n enkele CD verkoop nie, die meeste Afrikaanse musiekmense het nog nooit van hulle gehoor nie en Afrikaanse musiekliefhebbers nog minder. Tog het hulle oornag ’n fenomeen geword – ’n kletsrymtrio wie se musiek soos ’n virale infeksie oor die internet versprei.
Enter the Ninja, een van Die Antwoord se musiekvideo’s, het al meer as 480 000 trefslae op die videowebtuiste YouTube gekry, terwyl Zef Side met meer as 350 000 spog, en skielik neem almal deeglik kennis van hulle.
Hulle het pas ’n internasionale platekontrak losgeslaan en oorsese publikasies skryf met verwondering oor Ninja, Yo-landi Vi$$er en DJ Hi-Tek en die manier waarop hulle alles wat kommin – oftewel zef – aan die Afrikaanse gemeenskap is, skielik cool gemaak het.
Baie mense sal hul uitdagende musiek aanstootlik vind. Die lirieke is eksplisiet, die taal kru, die musiekvideo’s suggestief en daar is soms ’n amper gewelddadige, pornografiese onderstroming aan hul houding.
Tog word Die Antwoord se webtuiste oorstroom deur nuuskieriges.
Ninja is lank en skraal en het inkmerke oral op die lyf en die fyngeboude Yo-landi het ’n blonde mullet-haarstyl en spierwit wenkbroue. DJ Hi-Tek werk agter die skerms as die musiekvervaardiger.
Ses maande gelede het g’n mens nog gevra wat of wie Die Antwoord is nie, maar op 3 Februarie het dié rap-groep soveel opslae onder internasionale internetgebruikers gemaak dat ’n videogreep van hulle op die Amerikaanse TV-program Attack of the Show gespeel is. Daarna was daar ’n chaos op hul webtuiste met tot 10 000 trefslae per minuut, en sedertdien het 6 miljoen nuuskieriges al ’n draai daar gaan gooi.
Hulle het hul ding saam met DJ Hi-Tek begin.
“Ons is ’n spiff kommin en trots daarop. Almal het tog ’n stukkie innerlike zef. Selfs my ma,’’ laat hoor Yo-landi. Jy kan skaars glo dié fyn stemmetjie kan so laat looi met die kragwoorde.
Lees die volledige artikel in Huisgenoot van 18 Februarie, onder meer wat hul ouers en ander oor hulle te sê het.