'n Meer volwasse Polo met VW se moderner voorkoms nes dié van die Golf 6 en Scirocco, is hier. Die skerp hoeke, gespierde skouerlyn en gevormde agterstewe
is so reg uit die pen van Walter de Silva, die man wat die asemrowende Audi A5 ontwerp het. Die Polo lyk nie meer soos ’n bak jellie nie – dit is beter gedefinieerd en het grootgeword.
Dis langer, breër en ligter as sy voorganger en ry ook veel beter. Die soliede bou en rygehalte herinner aan dié van die eersteklas-Golf 6. En dit sê baie.
Die materiale binne is aangenaam om aan te raak, hoewel daar steeds plek-plek ’n spatsel goedkoop, harde plastiek is. Wat afwerking betref, het jy ’n keuse tussen swart en swart, met net ’n effense variasie in die materiaaltekstuur. By tye is die oormaat skakerings van swart oorweldigend, maar dit pas by die motor se ernstiger karakter en moderner voorkoms.
Omdat dit plaaslik vervaardig word, is die prys mededingend. Die basismodel is net R3 000 duurder as die vorige en en teen R209 900 is die vlagskip-dieselmodel goedkoper as sy voorganger.
Maar dit kan wees omdat albei die petrolenjins van die vorige reeks oorgedra is. Net die 1,6 L-diesel is nuut.
Danksy sy immer jeugdige karakter is die naaste mededinger, die fantastiese Ford Fiesta, byderwetser as die Polo – maar is dit beter?
’n Bitter stryd lê voor.
Die Polo-reeks
- 1,4 Trendline R144 900
- 1,4 Comfortline R161 900
- 1,6 Trendline R166 900
- 1,6 Comfortline R183 800
- 1,6 Comfortline Tiptronic R197 900
- 1,6 TDI Comfortline R209 900
Uitspraak
Dit is as Europese motor van die jaar vir 2010 aangewys. Dit sê genoeg.