Genoeg vir 6 mense
Bereiding: 15 minute
Gaarmaaktyd: 20-25 minute
350 g macaroni
15 ml (1 e) olie
1 ui, fyn gekap
2 knoffelhuisies, fyn gekap
500 g maer maalvleis
sout en vars gemaalde swartpeper
2 groot tamaties, ontvel en in blokkies gesny
500 ml (2 k) gaar gemengde groente
20 ml (4 t) blatjang
40 ml (8 t) basiliepesto
3 ekstra groot eiers, geklits
250 g (1 houer) gladde maaskaas
250 ml (1 k) room
250 ml (1 k) cheddarkaas, gerasper
ekstra pesto (opsioneel)
Voorverhit die oond tot 180 °C.
Smeer ’n oondvaste bak. Kook die macaroni in genoeg soutwater tot net gaar (al dente), dreineer en hou eenkant. Verhit die olie in ’n groot kastol en braai die ui en knoffel ’n paar minute. Voeg die maalvleis by en braai tot gaar. Geur met sout en peper.
Roer die tamaties, groente, blatjang en pesto by die maalvleismengsel in en meng goed. Giet die macaroni in ’n groot
oondbak en skep die maalvleismengsel oor; meng liggies.
Klits die eiers, maaskaas en room bymekaar en giet oor die maalvleis-en-macaronimengsel. Sprinkel die cheddar oor en bak 20-25 minute tot warm en die kaas gesmelt is.
Skep op en rond af met ’n ekstra skeppie pesto bo-oor, indien verkies.
Sit voor saam met ’n groenslaai.