(Foto: Met vergunning van Michael Schofield)
Haar “maatjies’’ woon almal in ’n ander wêreld genaamd Calalini waar die kwik soms tot 200 °C styg. Jani Schofield hou ’n skets van ’n kat omhoog. Sy naam is 400, sê sy.
Dit is dié kat, bieg Jani, en ’n rot genaamd Wednesday en ’n meisietjie met die naam 24 Hours, wat vir haar sê sy moet haar mamma, pappa en boetie seermaak. Sy is net sewe jaar oud, maar skisofrenie hou haar te dikwels gevange in ’n donker wêreld.
Sy was vyf jaar oud toe sy probeer selfmoord pleeg het. Dié dag het sy uit haar slaapkamervenster op die tweede verdieping van hul woonstel in Santa Clarita, Kalifornië, probeer spring, vertel haar pa, Michael. ’n Ander keer het sy haarself probeer verwurg.
Haar psigotiese episodes was teen Januarie verlede jaar so erg dat sy in ’n psigiatriese eenheid opgeneem moes word. Wanneer ’n psigotiese episode haar oorrompel het, sou sy haar ouers krap en byt dat die bloed loop, en sy het selfs probeer om haar pa se oë uit te krap. Sekondes later sou sy weer haar ou, liefdevolle self wees.
Met haar intellek skort niks en sy het ’n superieure IK van 146. Maar op vyf het sy al honderde denkbeeldige dierevriende op Calalini gehad. En hoewel Jani gekla het dat sy eensaam is, het dinge net vererger nadat haar boetie, Bodhi, gebore is. Mettertyd moes sy in die hospitaal opgeneem word, en uiteindelik is skisofrenie op ses jaar by haar gediagnoseer.
Dokters doen nou hul bes om haar psigotiese buie met medikasie te beheer, en haar hallusinasies is inderdaad nie meer so kwaai nie. Die gesin het nou twee aparte eenslaapkamerwoonstelle in dieselfde gebou, en sy en haar boetie bly elk in hul eie, sodat hy nie in vrees vir sy ousus grootword nie.
Lees die volledige artikel in Huisgenoot van 25 Februarie.
Kyk ook die videogrepe hieronder.