Wesley Sneijder van Nederland
WAYNE ROONEY, Christiano Ronaldo, Didier Drogba, Fernando Torres...
Vroeg verlede maand nog was ons skoon koorsig van opwinding oor dié superhelde van sokker wat ons asems hier in Suid-Afrika sou kom wegslaan.
Maar hoe het die helde toe nie geval nie. Hul vertoning by vanjaar se Fifa-wêreldbekertoernooi was met twee woorde ’n reuse teleurstelling.
Waar was Ronaldo se briljantheid, Rooney se meedoënloosheid, Drogba se betroubaarheid, Torres se flair? Die asemrowende oomblikke is toe almal deur relatief onbekende jong spelers verskaf, meestal onbekend in internasionale sokker.
So moes die helde van gister toe plek maak vir vandag se nuwe jong sterre. Ons kyk na ’n klompie wat vorentoe nog opslae kan maak.
WESLEY SNEIJDER (NEDERLAND)
Ouderdom: 26
Posisie: Middelveldspeler
Doele: 5
Hy sal altyd bekendstaan as die ou wat Brasilië uit die Wêreldbeker van 2010 geboender het. Nou weet ons waarom Jose Mourinho, die afrigter van Inter Milan, vanjaar se Europese kampioenspan, onlangs gewonder het waarom Real Madrid Wesley ná net twee seisoene laat gaan het. Die talentvolle speler het bewys hy is ’n sleutel tot die Oranjes se sukses. Hy kan met albei voete skop, is blitsvinnig en skep geleenthede vir sy spanmaats.
Lees meer oor die ander sokkerhelde in die Huisgenoot van 15 Julie 2010