Casey Johnson (Foto: Elite)
Sy sou biljoene dollars erf, maar is die ewigheid in sonder ’n sent op haar naam.
Haar lewe was veronderstel om ’n sprokie te wees, maar dit was allesbehalwe, vertel ’n kennis van Casey Johnson (30).
Die erfgenaam van die farmaseutiese reus Johnson & Johnson was in haar laaste dae so platsak dat sy skaars petrol in haar motor kon gooi, en die krag en water by haar huis is afgesny.
Die ‘‘baba-olie-erfgenaam’’, soos sy spottenderwys gedoop is, moes gereeld by haar vriende bakhand staan en sy was so agter met die paaiemente van haar peperduur Porsche dat sy dit in die motorhuis weggesteek het sodat hulle nie daarop beslag kon lê nie.
Haar ouers het haar nie meer ’n sent gegee nie. Dit was hul laaste, desperate poging om haar te red uit die dwelmhel waarin sy versink het. En nou treur hulle oor die dogter wat hulle tog ontglip het...
Casey se lewe is tragies kortgeknip en sy is kort ná Nuwejaar dood in haar huurhuis in Los Angeles aangetref. Sy was toe reeds drie dae dood.
Van haar rykmanslewe was nie veel oor nie. Haar huis het gewemel van die rotte. ‘‘Daar was oral vuil borde en kos wat sleg geraak het,’’ vertel ’n bron. ‘‘Daar is ook graffiti op die mure en die swembad lyk soos ’n moeras.’’
Hulle het dié dag lankal sien kom, sê mense na aan haar. As kind is diabetes by Casey gediagnoseer. Sy was van insulien afhanklik, maar het haar gesondheid afgeskeep en was die laaste paar maande meer as een keer in die hospitaal omdat sy nie haar insulien geneem het nie.
Sy het twee keer in ’n diabetiese koma verval. Ten spyte van alles wat haar familie se fabelagtige rykdom haar kon bied, was sy klaarblyklik nie ’n gelukkige meisie nie, en twee maande gelede het sy probeer selfmoord pleeg.
‘‘Ek het ’n hoop pille gedrink en gaan vir ewig slaap,’’ het sy ’n eks in ’n teksboodskap laat weet. Daardie keer kon sy darem gered word.
Lees die res van Casey se tragiese verhaal in Huisgenoot van 21 Januarie.