Evan Perry was net ses toe hy vir sy ma sê hy wil sterf. Ná verskeie mislukte pogings het
hy toe wel selfmoord gepleeg, amper 10 jaar nadat hy dié woorde vir sy ma gesê het.
In die jongste Huisgenoot (6 Mei 2010) praat Dana Perry (46), wie se dokumentêre rolprent Boy Interrupted die tragiese verhaal van haar seun vertel, oor die verskrikking om jou kind te hoor sê hy wil doodgaan.
Hier is 'n uitreksel van die artikel:
Dit is enige ouer se nagmerrie dat jou kind voor jou sal sterf. As nuwe ma was my twee grootste vrese dat
Evan ’n siekte sou opdoen of in ’n fratsongeluk seerkry. Dit was my plig om hom te beskerm.
Maar hoe beskerm jy ’n kind teen homself? Op 15 jaar, ná kinderjare waarin hy verskeie mislukte selfmoordpogings aangewend het, het hy uiteindelik geslaag. Hy het ná ’n rusie oor sy huiswerk uit sy slaapkamervenster op die vierde verdieping na sy dood gespring.
Evan se laaste woorde aan my was: “Ek haat jou, Ma.”
In daardie stadium het ek dit as een van sy buie afgemaak, maar ure later het my grootste nagmerrie waar geword.
Ek het altyd geweet hy is anders as ander kinders. Hy was baie intens en het in sy eerste skooljaar donker gedigte geskryf.
Ek onthou een wat begin het met: “I feel like an owl in the day.”
Ek het geweet hy voel asof hy nie inpas nie. Sy gesig was altyd onder die kappie van ’n top weggesteek.
“Ek wil protesteer,” het hy dikwels gesê. “Teen wat?” het ek gevra. “Enigiets,” het hy dan geantwoord. Dit was hy teen die wêreld.
Lees die volledige artikel in die Huisgenoot van 6 Mei 2010.