“ONS is, soort van, meer opgewonde as klein kindertjies,” het ’n eerstejaar-student met ’n Toy Story-T-hemp vandeesmaand op ’n Amerikaanse kampus laat hoor by ’n spesiale vooraf-vertoning van ’n lekkerte waarvoor veral die jonger brigade nie meer kan wag nie: Toy Story 3, en nogal in 3D.
Dié vooraf-kyk was toe nie na die hele fliek nie, maar tog ’n moewiese lekker koekeloer na die 3D-prent wat op 18 Junie gelyktydig oral oor die wêreld heen uitgereik word. Die studente kon byna ’n uur van die fliek sien waarin ons eie Jeremy Mansfield, radio-omproeper, se stem ook gehoor word – darem net in die plaaslike weergawe.
Net voor die spannende laaste deel is die ligte toe aangeskakel. Dit was net voor cowboy Woody en ruimteman Buzz Lightyear en kie se ontsnapping uit ’n dagsorgsentrum vol klein terroriste, waar die speelgoed kort voor hul eienaar, Andy, se vertrek kollege toe beland. En die reaksie van die studentegehore dwarsoor Amerika was glo in die trant van “Ag nee! Ons wil nog sien!”.
Hulle was so meegevoer deur die jongste avonture van die karakters waarmee hulle grootgeword het dat hulle skoon vergeet het hoe oud hulle is.
Dis vyftien jaar ná die uitreiking van die oorspronklike animasie-mylpaal wat aan die wêreld gewys het wat speelgoed aanvang wanneer hul eienaars nie kyk nie, en watter animasie-wonderwêrelde met bloot rekenaars opgetower kan word.
Dis ook meer as ’n dekade ná Toy Story 2, wat aanvanklik net vir video-uitreiking bestem was, maar toe ’n groter treffer was as nommer een.
Maar dit lyk asof Toy Story 3 voorwaar die wag werd gaan wees. Kenners meen trouens dit kan die grootste treffer van 2010 word:
Tom Hanks (Woody), Tim Allen (Buzz Lightyear) en die meeste ander stemkunstenaars wat die Toy Story-fenomeen help skep het, is weer met ons. Boonop sluit die sterbesaaide rolverdeling interessante nuwe karakters en ster-stemme in.
En Disney se Pixar-span, wat meer as vier jaar aaneen aan Toy Story 3 gewerk het, het met splinternuwe 3D-deurbrake vorendag gekom om die rekenaar-animasie waarin hulle die weg gebaan het, behoorlik te vervolmaak.
Lees meer oor Toy Story 3 in die Huisgenoot van 17 Junie 2010
Op die internet:
http://disney.go.com/toystory/
http://www.youtube.com/watch?v=v_FfHA5whXc