Al lyk dit soos net nog ’n High School Musical, is The Jerk Theory sprankelend genoeg om dit te laat uitstaan.
Daar is ’n sterk vonk tussen die twee hoofakteurs en ’n lewendige klankbaan wat grotendeels op Josh Henderson se debuutalbum gegrond is.
Adam (Henderson) is ’n ontluikende musikant en ’n regte gladdebek as dit by die meisies kom. Maar toe hy afgesê word, verander hy sy deuntjie en kom vorendag met wat hy die “jerk theory’’ noem. En dit werk. As skurk kry hy al die meisies – tot sy paadjie met dié van die borrelende Molly (Dewan) kruis. Sy is klaar met skurke en skielik moet Adam sy teorie hersien, met baie snaakse gevolge.
Die veteraan-akteur Tom Arnold in die rol van die lomp vader Bailey dra by tot die pret. Die mollige Clinton (Jesse Heiman) steel die kollig toe hy te hard probeer koel lyk. Die borrelende, lekkervoel-komedie is ideaal vir ’n gesinsaand by die huis.
Tienerkomedie. Met Josh Henderson, Jenna Dewan en Tom Arnold. Regie: Scott S. Anderson. 2009. 93 min. 13S.
Wat ons dink: 3/5