Ly jy aan ’n ernstige graad van Twilight-onttrekkingsiekte? Is daar dae dat jy heimlik wonder of Jacob Black en Edward Cullen-hulle nie maar net spookfigure in jou drome was nie? Hou moed, daar is hoop.
Stephenie Meyer, skrywer van die supergewilde Twilight-reeks, het onlangs aangekondig daar kom ’n nuwe vampierboek! Dit sou eers as kortverhaal op haar webtuiste gepubliseer word, maar toe hardloop die boek skoon onder haar uit en word ’n nuwe, eie storie.
Vir die Twilight-onttrekkingsimptome is daar boonop die derde fliek in die reeks, Eclipse, wat op 2 Julie hier begin draai.
Dan sal die skrywer wie se eerste twee flieks, Twilight en New Moon, wêreldwyd al sowat R7,5 biljoen verdien het, natuurlik nog ’n entjie ryker wees – en dan praat ons nie eens van die sowat 90 miljoen eksemplare van haar Twilight-boeke wat al verkoop is nie.
Intussen kan aanhangers solank ’n sirkeltjie om 5 Junie op hul kalenders trek, want dis wanneer The Short Second Life of Bree Tanner in die boekwinkels sal wees. Dis Stephenie se eerste boek in twee jaar en duisende aanhangers, aangetrek soos karakters uit die boeke, sal na verwagting oornag in toue wag om dit op te raap. Die uitgewers beplan om 1,5 miljoen eksemplare te druk – vir ’n begin . . .
Maar wie is Bree Tanner nou eintlik? Twilight-slawe het haar reeds ontmoet – enige ware aanhanger sal weet sy verskyn net vlugtig in Eclipse, maar dis in die sleuteltoneel waar Bella en die Cullens ’n klompie van Victoria se wilde vampiere in die woud raakloop.
Victoria, die rooikopvampier wat wraak soek op Bella en die Cullens nadat haar geliefde, James, vermoor is, het van Bree Tanner ’n vampier gemaak. Sy skaar haar by die Cullens en probeer hul vegetariese leefstyl navolg.
Bree sterf dan in Victoria se oorlog teen die Cullens en die Quileute-weerwolf-stam.
“Ek het The Short Second Life of Bree Tanner nog altyd as iets vir die aanhangers beskou. Hulle was nog altyd baie ondersteunend met alles wat met Twilight te make het,” sê Stephenie.
“Ek is net so verras soos al die ander mense oor die novelle,” bely Stephenie. “Toe ek in 2005 daaraan begin werk het, was dit net ’n oefening om my te help om Eclipse se ander kant te ondersoek. Ek het gedink dit gaan ’n kortverhaal word wat ek op my webtuiste sou kon plaas, maar toe raak die storie langer as wat ek verwag het.”
Lees die volledige artikel in Huisgenoot van 20 Mei 2010.