Marian Keyes (Foto: Elite)
Dit was ’n ontboeseming wat haar miljoene aanhangers sprakeloos gelaat het – dat een van die gewildste skrywers van haar tyd in hierdie dae so kwaai onder die las van depressie gebuk gaan dat dit haar heeltemal buite aksie gestel het.
Die Ierse skrywer Marian Keyes is een van die baanbrekers van sogenaamde chick lit-boeke, en haar heldinne, vroue met leeuemoed, kan die snykant van die lewe met eg Ierse humor stomp stamp.
Maar Marian self vind deesdae nie veel om oor te glimlag nie. So het sy op 10 Januarie op haar webtuiste teenoor haar aanhangers verklaar: “My liewe amigos, voorspoedige nuwe jaar vir julle almal en ek hoop die feesgety was nie te onsmaaklik nie. Ek is baie jammer, maar dit gaan ’n baie kort stukkie wees dié, want ek is platgetrek deur verlammende depressie. Gereelde lesers weet ek is vatbaar vir depressie, aan en af oor die jare, maar hierdie keer is dit in ’n liga van sy eie. Dis baie erger.”
Baie mense kan hulle skaars indink hoe ’n vrou met ’n liefdevolle man en ’n suksesvolle loopbaan wat van haar ’n multi-miljoenêr gemaak het, aan depressie kan ly. Sedert haar eerste boek, Watermelon, in 1995 gepubliseer is, is al 23 miljoen eksemplare van haar 11 boeke verkoop. Marian was nog altyd eerlik oor haar demone – ook alkoholisme.
En nou skryf sy: “Ek weet mense gaan vra: ‘Waaroor is sy depressief, die selfbehepte kermkous, as daar ander mense is wat regte probleme het?’ “Al wat ek wil sê, is dat ek bewus is van die moeilike tye en dat daar mense is wat so verpletter is deur die huidige ekonomiese klimaat dat hulle die dak oor hul kop verloor het en elke dag vir hulle ’n stryd om basiese oorlewing is, en ek wens ek kan hul pyn laat verdwyn.”
Lees oor Marian se stryd in Huisgenoot van 21 Januarie.