Jou eie mense is darem maar lekker. En as dié mense boonop die Blou Bul-familie is, kan dit mos nie lekkerder nie.
Vra maar vir Jaco van der Westhuyzen (31). Want al was Japan goed vir die gewilde Bulls-agterspeler en het hy en sy gesin lekker daar gewoon, het hy maar altyd daarna gesmag om weer vir sy geliefde Bulle te speel.
Nou is Jaco terug uit Japan, waar hy die afgelope ses jaar vir die klubspan die NEC Green Rockets uitgedraf het, en hy kan nie wag om die Pretorianers te help om weer ’n Super14-trofee te wen nie.
In sy eerste vier jaar daar het ons hom darem nog elke Super14-seisoen op Loftus in aksie gesien, en ons het amper nie eens geweet hy trek elke Augustus sak en pak met vrou en kinders na Japan vir die Rockets se plaaslike seisoen nie.
Maar die laaste keer dat Bul-ondersteuners Jaco toe sou sien, was in 2007 met die Bulls se Super14-oorwinning toe hy sy trui uitgetrek en met ’n T-hemp waarop staan “Jesus is King” teen die rugbypaal opgeklouter het.
Die volgende seisoen het sy Japannese span daarop aangedring dat hy al in Mei daar aanmeld, en sy hart was baie seer toe hy die Bulle moes laat weet hy kan nie meer vir hulle uitdraf nie. “Toe mis ek hul Super14-wen verlede jaar,” sê Jaco afgehaal waar ons by hom en vroulief Cornelda (31) op Marble Hall, Mpumalanga, kuier.
Dié dae is nou verby, sê Jaco beslis. Hy is vir altyd terug, en min gepla dat hy nie op die oomblik in die Bulls se beginspan speel nie. Hy wag met liefde sy beurt op die plaasvervangerbank af, want “ek leef vir die Bulle”.
Dis al ’n ou storie, maar dit bly waar: “By die Bulle gee almal vir almal om, almal is vriende en almal sal enigiets vir mekaar doen.”
Lees die volledige artikel in die 11 Maart-uitgawe van Huisgenoot.