Hy het nou die dag nog hoog en laag gesweer: Hy weer trou? Nie sommer nie.
Maar toe Pedro Camara (44) weer sien, skiet Kupido se pyltjie jou wrintiewaar ’n kolskoot. Dié dat die gewese 7de Laan-akteur vandag hier ewe spiekeries gedas en ge-aandpak staan. Slaggereed om weer die strop om die nek te kry.
Ná sy egskeiding in 2004 het die Laan se vurige Carlos Perestrelo volgehou hy lê nie weer troubeloftes af nie. En daar kom krap ’n fyngeboude Namakwalander genaamd Petra Mulder (38) toe drie jaar later sy alleenloper-plannetjies deurmekaar.
Ja wat, besluit Pedro toe, dan trou hy maar weer . . .
Die geur van vars rose hang in die lug terwyl sagte agtergrondmusiek die prentjie afrond in die kerkie op die wynlandgoed Meerendal naby Durbanville in die Kaap. Romanties verby. Geen sweempie senuagtigheid is te bespeur by die man met die Portugese bloed in sy are nie. Sy donker oë soek-soek na die lenige blondine wat nou enige oomblik in die deur gaan verskyn.
Toe Petra uiteindelik in haar Charlene Sauerman-skepping aangestap kom, snak ’n paar gaste hoorbaar na hul asem.
En daar voor die kansel langs sy 11-jarige strooijonker en seun, Enzo, kan ’n sigbaar aangedane Pedro nie vir een oomblik sy oë van die amper-mevrou Camara af wegskeur nie.
Hul paaie het in 2007 gekruis toe ’n kennis Pedro omgepraat het om sy destydse persoonlike assistent op ’n toeoog-afspraak uit te neem, vertel hulle. Hulle het lekker gekuier. Toe sy hom ’n week later na ’n troue nooi, het hy dit ewe beleefd van die hand gewys.
Twee maande het verbygegaan sonder kontak, en toe bel hy haar weer. “Ek dink ek het die vriendskap gemis; ons het tog lekker gesels daardie eerste aand,’’ vertel Pedro.
In Junie verlede jaar het hy besluit, dié ene met die sagte siel kan hy nie deur sy vingers laat glip nie.
Die troue moes so tussendeur hul werk gereël word. Sy eksvrou, Karin Versfeld, het ook flink handjie bygesit met die ontwerp van die uitnodigings en naamkaartjies.
Lees die volledige artikel en sien meer foto's in Huisgenoot van 11 Februarie.