Daar’s mín plekke waar haar musiek nie geluister word nie. Van Kaapstad tot Pretoria, Peddie tot Pofadder, al teen die Weskus langs en op die vlaktes van die Groot-Karoo, oral spoel Laurika Rauch se stem al die afgelope drie dekades deur al wat ’n Afrikaanse huis is.
Maar in haar eie huis hier in Pretoria is daar meestal – eintlik amper altyd – stilte. Jy hoor die wind in die bome, sonbesies wat buite tjir, voëls wat mekaar roep, die veraf geluide van die stad se rumoer.
Hier binne, hier waar die legendariese sanger woon en werk, is die plek waar melodieë gebore word, waar Laurika se man, die afgetrede ekonomieprofessor en liedjieskrywer Chris Torr, maande lank aan lirieke skaaf. Dis ’n ruimte waar gedagtes en verhale lewe kry, ’n plek waar onvergeetlike liedjies hul eerste bestaan kry.
Die twee se 22-jarige kunstenaar-dogter, Nina, het onlangs vir haar ma ’n iPod present gegee en sy het spesiaal vir Laurika liedjies daarop gelaai sodat sy snags, wanneer die slaap dalk wegbly, daarna kan luister. “Ek luister ook radio of klassieke musiek in die motor, maar in die huis is daar altyd totale stilte,” sê die sanger met die geheimenisvolle Mona Lisa-glimlag waar sy haar vroegoggend in ’n sonkol op haar stoep tuis-maak.
Sien meer foto's en lees die volledige artikel in die uitgawe van 18 Maart.