Die sanger bons soos ’n rubberballetjie by die kantoor van sy platemaatskappy in. Hy gesels dié kant, terg daai kant, die ene energie. Daar is ’n blos op sy wange, sy oë blink en sy glimlag is so breed soos dié van iemand wat pas ’n lepel geluk afgesluk het.
Nicholis Louw is skoon uitbundig, so amper asof hy nie besef hy is eintlik onder ’n skaduwee nie. Want die gewilde sanger se voormalige fiksheidsinstrukteur het pas in ’n koerant beweer hy het gereeld stimulante en steroïede gebruik terwyl hy die oefen- en eetprogram gevolg het wat Huisgenoot spesiaal vir hom uitgewerk het om hom te help gewig verloor.
Dit was glo dié middels wat hom gewig laat verloor het.
Hokaai, keer Nicholis, wag eers ’n bietjie. Hy erken hy het efedrien en steroïede gebruik, maar sê hy het lankal daarmee opgehou, lank voor hy verlede jaar Huisgenoot se program begin volg het.
Hy het sedert 2007 nog nooit weer aan die middels geraak nie, hou hy vol.
Dis waar, sy gewig het die afgelope ruk wipplank gery. Hy het 100 kg geweeg voor hy Huisgenoot se program vier maande lank gevolg en 10 kg verloor het.
Daarna het hy die verslankingsmiddel Simply Slim begin gebruik, en binne ’n maand nog sowat 5 kg verloor. Maar hy het dié toe weer oor Kersfees aangesit! Hy weeg deesdae 90 kg, en mik na 78 kg.
Hy het Simply Slim nog tot onlangs gebruik, selfs nadat hy gehoor het “vier vroue is daaraan dood”, en eers opgehou toe sy meisie, Denise Shrewsbury, hom gesmeek het om dit te staak. Dié dieetpil is onlangs verbied.
“Ek het nog altyd gesê ek wil nie hê mense moet my as ’n rolmodel beskou nie. Ek is ’n sanger. As jy van my musiek hou, koop dit. As jy nie daarvan hou nie, moet dit nie koop nie. Dis dit,” sê hy.