In die fliek Jakhalsdans kry Neil Sandilands se karakter nie die mooi, blonde heldin nie, maar in die werklike lewe werk dinge gelukkig nie altyd uit soos in die flieks nie. En daar glimlag dié troebadoer deesdae breed, want hy het soos ’n egte sprokiesheld ’n lieflike brunet se hart in ’n vreemde land gaan steel.
By die afgelope Klein Karoo Nasionale Kunstefees op Oudtshoorn was dit glashelder: Twee van die land se gewildste sepiesterre is ’n paartjie, en hulle is duidelik verlief.
Ja, Bart van 7de Laan en Bienkie van Egoli, oftewel Neil en Esta TerBlanche, het mekaar ’n paar maande gelede in Los Angeles ontmoet. Esta het meer as 10 jaar gelede geëmigreer en het naam gemaak in die gewilde Amerikaanse sepie All My Children.
Omdat sy so lank reeds oorsee is, het sy nie geweet daardie diep Afrikaanse stem wat sy op ’n dag in Los Angeles oor die telefoon gehoor het, behoort aan ’n baie aantreklike hartebreker nie. “Sy het nie my naam duidelik oor die foon gehoor nie, en toe ons vir koffie bymekaarkom, was sy verbaas om te sien ek is nie Soli Philander nie!” vertel Neil met ’n breë glimlag.
Die twee het mekaar in ’n Mexikaanse eetplek ontmoet en daar was onmiddellik ’n vonk. “Een koffie het nog ’n koffie geword en later het ons ophou tel,” vertel Neil.
“Die volgende aand het ons gaan Thai-kos eet, en vir die res van my verblyf het ons mekaar net een dag nie gesien nie.’’
Lees die volledige artikel in die Huisgenoot van 29 April 2010.