Dit was ’n liefdesverhaal so reg uit die Hollywood-hemel. Al die elemente was teenwoordig: skoonheid, brandende passie, ’n tikkie gevaar, iets amper wilds.
En daar was nog: Die eksvrou, te na gekom, maar steeds waardig – en hy het haar ook steeds opgesoek – die reënboogkroos, die versameling herehuise, gekoop met ’n fortuin wat oënskynlik onuitputlik was.
Die naam was ook iets anders: Brangelina. Vyf jaar lank was dit net Brangelina dit, Brangelina dat . . . en nou is dit alles verby. So lyk dit beslis ná die aankondiging dat Brad Pitt en Angelina Jolie egskeidingsprokureurs gaan spreek het om ’n skikking te beding vir wanneer – nie ás nie – hul paadjies skei. En dit sê baie dat nie Brad óf Angie se kamp enigiets bevestig of ontken nie.
Die einde van die verhouding tussen ’n paar wat nooit tot by die kansel gevorder het nie, word reeds die egskeiding van die eeu genoem. Hulle het ’n gesamentlike fortuin van $322 miljoen (sowat R2,4 biljoen), huise in Los Angeles, New Orleans, Frankryk en Doebai, en ses kinders. Verlede jaar was hulle – met ’n inkomste van $55 miljoen (sowat R412 miljoen) – die paartjie wat op twee na die meeste geld ter wêreld verdien het.
Brad het intussen glo ’n tweeslaapkamer-blyplek vir $1,4 miljoen (R10,5 miljoen) gekoop, langs die gesin se huis in Los Angeles.
Dis ’n feit dat Brangelina aandag trek. Al sedert hulle mekaar op die stel van Mr and Mrs Smith ontmoet en heftig ontken het dat hulle verlief is aangesien Brad nog met Jennifer Aniston getroud was, wou die wêreld meer weet.
En saam op die silwerdoek was die seksuele aantrekkingskrag tussen Brad en Angie iets wat omtrent die silwerdoek laat smelt het.
Nou loop die gerugte dik dat Brad Jennifer dalk weer sal opsoek.
Die skrif is al ’n ruk lank aan die muur. Die grootste deel van verlede jaar was daar gerugte dat die twee se paadjies gaan skei omdat hulle selde saam gesien is.
Daar is gerugte dat Angie uit die Brangelina-bed gedwaal en ’n verhouding aangeknoop het.
Lees die volledige artikel in Huisgenoot van 4 Februarie.