Olivia Groenewald van Cloetesville op Stellenbosch het haar spesiale resep vir ons deurgestuur.

Genoeg vir 6 mense

Bereiding: 20 minute

Gaarmaaktyd: 15 minute

HOENDERROLLETJIES

6 ontbeende en ontvelde hoenderborsies

15 ml (1 e) botter of olie

30 ml (2 e) dennepitte

100 g spinasie, ontstingel en fyn gekap

’n knippie neutmuskaat

sout en peper

125 ml (½ k) vars broodkrummels

1 wiel fetakaas, gekrummel

hoenderaftreksel om in te kook

olie om in te braai

SOUS

30 ml (2 e) olyfolie

1 ui, fyn gekap

3 knoffelhuisies, gekneus

100 ml witwyn of hoenderafteksel

100 ml natuurlike jogurt

15 ml (1 e) gekapte grasuie

5 ml (1 t) Dijon-mosterd

’n knippie suiker

sout en vars gemaalde swartpeper

ROLLETJIES

Plaas die hoenderborsies op ’n werkoppervlak, plaas ’n vel kleefplastiek bo-oor en kap platter met die onderkant van jou handpalm of ’n rolstok of houthamer.

Hou eenkant.

Verhit die botter en braai die dennepitte effens, voeg die spinasie by en verhit tot verwelk en alle vloeistof verdamp is.

Geur met neutmuskaat, sout en peper en voeg die broodkrummels en fetakaas by.

Verdeel die vulsel tussen die plat hoenderborsies. Rol op en draai stewig toe in kleefplastiek.

Plaas die bondels in verhitte hoenderaftreksel en laat sowat 7minute kook tot net gaar.

Verwyder uit die hoenderaftreksel, haal die kleefplastiek af en braai elke rolletjie vinnig in verhitte olie tot net effens bruin buite-om indien verkies.

Skep uit en plaas op ’n dienbord.

SOUS

Verhit intussen die olie en braai die ui en knoffel daarin tot sag. Voeg die wyn of hoenderaftreksel, jogurt, grasuie, mosterd en suiker by en kook af tot ’n geurige sous.

Geur met sout en peper en giet oor hoender.

Sit voor met kapokaartappels en slaai.

Volg Huisgenoot op Twitter.

Huisgenoot 4 Januarie 2010.