Genoeg vir 4 mense (lewer 4-6 groot samoesas)

Bereiding: 20 min.

Gaarmaak: 35-40 min.

15 ml (1 e) botter

2 rooi-uie, in skywe gesny

2 knoffelhuisies, fyngedruk

500 g varkmaalvleis

1 Granny Smith-appel, geskil en gerasper

2 wortels, gerasper

15 ml (1 e) vars vinkel, gekap

sout en peper

250 g filodeeg

45 ml (3 e) botter, gesmelt

5 ml (1 t) papawersade (opsioneel)

DOOPSOUS

125 ml (½ k) mayonnaise

tabascosous na smaak

Voorverhit die oond tot 200 °C.

  1. Verhit die botter en braai die uie stadig tot gekaramelliseer. Voeg die knoffel en maalvleis by en braai tot gaar.
  2. Voeg die appel, wortels en vinkel by en roerbraai effens. Geur met die sout en peper. Laat die mengsel effens afkoel.
  3. Neem ’n vel filodeeg, verf die kante rofweg met die botter, vou in die helfte en druk vas. Verf die rande van die deeg weer liggies met die botter. Vou een van die onderste punte van die deeg in en plak vas aan een van die sykante van die deeg sodat ’n driehoek aan die onderkant vorm. Stop die opening wat so vorm goed met die vulsel. Vou die vleispakkie oor na die teenoorgestelde kant. Herhaal tot bo en tot ’n driehoek gevorm word. Verf die hele samoesa liggies met die botter. Herhaal met die res van die deeg en vulsel.
  4. Pak die samoesas op ’n bakplaat en sprinkel die papawersaad oor. Bak 15-20 min. of tot goudbruin.
  5. Doopsous Meng die mayonnaise en die tobascosous.
  6. Sit die samoesas voor saam met die doopsous en ’n groenslaai.

WENK

As jy nie lus het vir al die werk nie, maak ’n pastei: Stapel die filodeegvelle opmekaar, skep die vulsel op en frommel die filo effens om die vulsel. Bak tot die deeg gaar is.