Lewer 4 porsies

Bereiding: 10 minute

Rustyd: 2-3 uur

Gaarmaaktyd: 10-12 minute 

ROOIWYN-EN-KARRINGMELKMARINADE 

250 ml (1 k) karringmelk

250 ml (1 k) rooiwyn

3 lourierblare

dik repe skil van 1 suurlemoen

paar takkies tiemie of roosmaryn

VLEIS

4 porsies volstruisfilet, 90 g elk

Marmite of aangemaakte mosterd en olyfolie vir smeer

roketblare vir voorsit

romerige rooiwynsous (sien resep onder)

MARINADE

Meng al die bestanddele vir die marinade saam.

Plaas die vleis in ’n nie-metaalagtige bak, giet die marinade oor sodat die vleis heeltemal bedek is en laat 2-3 uur daarin lê – nie langer nie, want dan kan die vleis“melerig” word.

VLEIS

Haal die filet uit die marinade en druk droog met kombuispapier.

Verf die vleis ligweg met ’n leksel Marmite of mosterd en olyfolie.

Braai oor baie warm kole op ’n oop rooster of in ’n goedverhitte gietysterpan vir minstens 1 minuut per kant sodat die buitekante kan seël (die filet sal loskom van die pan as jy dit optel) tot die verlangde graad van gaarheid.

Sit voor met rooiwynsous op roketblare.

Voorgestelde gaarmaaktye (filet van 2,5 cm dik): Byna rou: 4-5 minute; medium: 6-7 minute; mediumgaar: 5-6 minute.

ROMERIGE ROOIWYNSOUS

250 ml (1 k) Pinotage of enige ander rooiwyn

30-60 ml (2-4 e) heuning 15 ml (1 e) heelkorrelmosterd

paar takkies vars tiemie of roosmaryn

1 pakkie (120 g) bloubessies

15-30 ml (1-2 e) natuurlike jogurt

Plaas al die bestanddele buiten die bloubessies en jogurt in ’n kastrolletjie en laat kook tot dit met minstens die helfte afgekook is en effens verdik het.

Voeg die bessies halfpad deur die kooktyd by.

Laat effens afkoel en roer die jogurt by om ’n bietjie romerigheid te verskaf.

Volg Huisgenoot op Twitter.