Genoeg vir 4 mense

Bereiding: 10 minute

Gaarmaaktyd: 35-40 minute

10 ml (2 t) olyf- of canola-olie

1 groot ui, geskil en fyn gekap

10 ml (2 t) mosterdsaad of 5 ml

(1 t) mosterdpoeier

500 g volstruissteak, in klein blokkies gesny

15 ml (1 e) koekmeel

10 ml (2 t) biefaftrekselpoeier, laernatrium

30 ml (1 x 50 g-sakkie) tamatiepasta

10 ml (2 t) tamatiesous

2 ml (½ t) suiker

15 ml (1 e) balsemieke asyn

15 ml (1 e) sojasous

30-45 ml (2-3 e) soet sjerrie

5 ml (1 t) droë origanum of

20 ml (4 t) vars origanum

300 g sampioene, in skywe gesny (’n mengsel van oester-, bruin- en dwergsampioene werk goed)

2 ml (½ t) sout

vars gemaalde swartpeper na smaak

30 ml (2 e) vars pietersielie, gekap

Verhit die olie in ’n groot, vlak kastrol en soteer die ui tot deurskynend. Voeg die mosterdsaad (of -poeier) by en roer tot die saad begin ontplof (as jy die saad gebruik). (Mosterdsaad voeg ekstra geur by sonder die skerp smaak, terwyl mosterdpoeier ’n effense byt het.) Voeg die vleis by en besprinkel met die meel en aftrekselpoeier. Roer tot dit deeglik gemeng is, en laat kook tot die vleis effens verbruin. Voeg die tamatiepasta, tamatiesous, suiker, asyn, sojasous, sjerrie en genoeg water by om die vleis net te bedek (sowat ½ koppie). Bedek met ’n deksel of tinfoelie.

Verlaag die hitte en laat prut sowat 20 minute. Voeg die origanum en sampioene by en kook onbedek vir 15 minute.

Geur met die sout en peper en roer die pietersielie in.

Sit voor op laer-GI-pasta of-rys (125 ml per persoon) en twee tot drie gaar groentesoorte.