1 kg goeiegehalte-beesvleis-ghoelasj, in blokke gesny

500 ml (1 houer) karringmelk

sout en vars gemaalde swartpeper

olie

2 uie, in ringe gesny

4 knoffelhuisies, fyngedruk

15 ml (1 e) vars gemmerwortel, fyn gerasper

1 groen soetrissie, ontkern en in repe gesny

1 kaneelstok

6 kardemomsade, gekneus (opsioneel)

1 lourierblaar

15-20 ml (3-4 t) matige geroosterde masala of kerriepoeier

15 ml (1 e) fyn komyn

15 ml (1 e) borrie

5 ml (1 t) fyn koljander

2 ml (½ t) neutmuskaat

1 ml (¼ t) rooipeper

1 blik (400 g) heel, geskilde tamaties, fyner gekap

handvol gekapte koljanderblare

20 ml (4 t) witsuiker

½ suurlemoen se sap

poppadums

Laat lê die vleis oornag in karringmelk.

Druk droog, geur met sout en peper en braai in ’n bietjie olie tot bruin.

Skep uit.

Vee die pan skoon; giet nog olie in.

Soteer die uie, knoffel, gemmer en soetrissie saam met die heel speserye in ’n klein bietjie olie in ’n groot swaarboomkastrol tot sag.

Voeg die res van die geurmiddels by en roerbraai nog 1 minuut.

Voeg die tamaties en koljanderblare by.

Verlaag die hitte en laat prut tot die vleis sag en gaar en die sous lekker dik is. (Voeg warm water by as die kerrie droogkook.)

Geur met suiker, suurlemoensap en nog sout en peper indien nodig.

Sit voor saam met speseryrys en sambals.

Mikrogolf die poppadums op hoog vir 1-2 minute tot uitgepof.

SAMBALS

• Tamatiesambal: Ontpit ’n tamatie en kap fyn. Voeg ’n bietjie asyn, suiker en 2 groen brandrissies by wat ontpit en gekap is. Sprinkel fyn gekapte vars koljanderblare by.

• Geelwortelsambal: Rasper 4 geelwortels fyn en voeg 60 ml (4 e) fyn gekapte vars koljanderblare en 1 gekapte ontpitte groen brandrissie by. Geur met sout; roer 60 ml (4 e) suurlemoensap in.

• Piesangsambal: Meng 5 piesangs wat in skyfies gesny is met 30 ml (2 e) suurlemoensap, 50 ml klapper en ’n knippie witsuiker en sout.

Volg Huisgenoot op Twitter.