Genoeg vir 6 persone

Tradisioneel word dit saam met osso bucco voorgesit om deur die ryk smaak van die kalfskenkels te sny. Dis baie geurig en werk ook uitstekend saam met seekos.

  • 40 g (45 ml) botter
  • 1 ui, fyngekap
  • 2 knoffelhuisies, fyngekap
  • 1 rooi brandrissie, fyngekap
  • 2 x 400 g-blikke witbone, gedreineer
  • 500 ml melk
  • sout en vars gemaalde swartpeper
  • Steurgarnale
  • 4 knoffelhuisies, fyngekap
  • 1 hand vol pietersielie, fyngekap
  • sap en skil van 2 suurlemoene
  • 24 steurgarnale, skoongemaak en doppe verwyder
  • sout en vars gemaalde swartpeper
  • 45 m olyfolie

  1. Verhit die botter in ’n groot pot tot goed warm.
  2. Voeg die ui, knoffel en brandrissie by. Roerbraai 2-3 minute of tot dit begin verbruin.
  3. Voeg die bone by en braai nog 5 minute.
  4. Gooi die melk by en kook tot dit met die helfte verminder het.
  5. Geur goed met sout en peper.
  6. Puree tot ’n gladde mengsel met ’n staafmenger.

Maak die garnale so: Meng die knoffel, pietersielie en suurlemoensap en -skil. Sprinkel dit oor die garnale. Geur goed met sout en peper. Verhit die olyfolie in ’n middelslag-braaipan tot goed warm. Braai die garnale sowat 3-5 minute of tot goudbruin en gaar. Skep die puree in ’n groot opdienbak en pak die garnale bo-op. Sit voor.

Wenk: Jy kan enige witboontjie vir die puree gebruik. Ek hou van die Italiaanse cannellini-boontjie. Dis belangrik om geblikte bone onder koue lopende water af te spoel om ontslae te raak van die styselagtige vloeistof in die blik.

Hierdie resep kom uit Herman Lensing se boek, VOORSKOOT. Bestel dit hier

voorskoot