Die volmaakte saamneem-nagereg. Ons het dié klassieke Italiaanse laag-op-laag-gereg ’n bietjie aangepas en in flesse berei sodat ’n mens dit maklik saam kan neem vir ’n piekniek.

Genoeg vir 4 mense

Bereiding: 25 min.

Verkoel: 2 uur

4 eiers, geskei

250 ml (1 k) strooisuiker

500 g mascarponekaas

5 ml (1 t) vanielje-ekstrak

250 ml (1 k) sterk, koue koffie

’n skeut Cape Velvet-likeur (opsioneel)

200 g vingerkoekies

250 g karamelkondensmelk

kakaopoeier vir bestuif

  1. Klits die eiergele en strooisuiker saam in ’n groot mengbak tot lig en skuimerig. Meng die mascarpone en vanielje-ekstrak in tot goed gemeng en sit dan eenkant.
  2. Klits die eierwitte in ’n skoon bak tot styf. Voeg ’n lepel vol van die geklitste eierwitte by die eiergeelmengsel en roer deur. Voeg die res van die eierwitte by en vou sagkens deur.
  3. Meng die koffie en likeur (indien gebruik) in ’n wye bak. Doop die vingerkoekies in die vloeistof en rangskik dit dan op die bodem van 4 glasflesse. Hou ’n paar eenkant vir garnering.
  4. Smeer versigtig ’n laag van die mascarpone-mengsel bo-oor en skep ’n paar eetlepels van die karamel oor. Herhaal met die res van die bestanddele en eindig met ’n laag van die mascarpone-mengsel.
  5. Bestuif met ’n bietjie kakaopoeier en garneer met die vingerkoekies wat jy eenkant gehou het. Verkoel 2 uur in die koelkas voor jy dit voorsit.

Deur Hope MalauFoto: David Briers