Kerneels Breytenbach, pas afgetrede hoof van NB-uitgewers, is ’n alsydige man – ’n fyn kenner (en verslaafde) van woord en boek, musiek en kuns, maar veral goeie kos en wyn. Saam-saam het hy, sy vrou, Carien, en die jonge Jana wat deesdae assistent is in Huisgenoot se kombuis, spesiaal in hul lekkerleefhuis in Bettysbaai aan dié heeldag-spyse gekook.

FRANSE ROOSTERBROOD MET APPELKANEEL

“Ek is dol oor Franse roosterbrood. My ma het altyd kaneelsuiker daaroor gestrooi. Maar ’n mens soek altyd na iets anders om met die oorbekende te doen. Ek het afgekom op ’n resep wat in 1996 in die Chicago Sun Times gepubliseer is, waar ’n mens dit met appels en crème fraîche daarby maak.”

Genoeg vir 10 mense

Bereiding: 10 minute

Gaarmaaktyd: 1 uur

Staantyd: oornag

1 Franse brood, in 3 cm-snye gesny; 8 groot eiers, effens geklits; 875 ml (3½ k) melk, afgeroom of volroom; 250 ml (1 k) suiker; 5 ml (1 t) vanielje-ekstrak; 6 middelslag-appels, stronke verwyder en in dun snye gesny; 15 ml (1 e) fyn kaneel; 5 ml (1 t) fyn neutmuskaat; 15 ml (1e) botter; crème fraîche en ontdopte pistasieneute om mee voor te sit

Spuit ’n oondvaste bak met kleefwerende kossproei. Pak die snye brood dig teen mekaar in die bak. Meng die eiers, melk en die helfte van die suiker en vanielje-ekstrak saam. Giet die helfte van die mengel oor die brood. Rangskik die gesnyde appels egalig bo-op die brood. Giet die res van die melkmengsel oor die brood en appels. Meng die res van die suiker, kaneel en neutmuskaat. Sprinkel dit oor die appels. Stip met die botter. Bedek met kleefplastiek en bêreoornag in die yskas.

Voorverhit die oond tot 180 °C. Verwyder die kleefplastiek en bak sowat een uur. Verwyder uit die oond en laat staan 10-15 minute. Sny in blokke en sit louwarm voor met crème fraîche en pistasieneute.