Genoeg vir 6 mense

Bereiding: sowat 45 minute

Verkoeltyd: sowat 2-3 uur

CHARLOTTE RUSSE

1 pak (125 g) sponsvingerbeskuitjies

90 ml (6 e) neutlikeur

60 ml (¼ k) melk

15 ml (1 e) gelatien

560 ml (2¼ k) room

5 ml (1 t) vanieljeekstrak

125 ml (½ k) haselneute, gerooster en grof gekap

vars kruisementblare vir versiering

BOTTERKARAMELSOUS

180 ml (¾ k) suiker

45 ml (3 e) water

180 ml (¾ k) room

15 ml (1 e) botter

Voer die kant en boom van ’n nageregvorm of soufflébak met kleefplastiek uit.

  1. CHARLOTTE RUSSE Pak die sponsvingers styf teen mekaar al om die rand van die bak met die suikerkant van die beskuitjies na buite. Smeer 30 ml (2 e) van die likeur met ’n kwas oor al die sponsvingers en hou eenkant.
  2. Giet die melk in ’n klein kastrol, sprinkel die gelatien oor en laat 5 minute staan sodat die gelatien kan versag. Verhit die gelatienmengsel oor lae hitte en roer aanhoudend tot die gelatien opgelos het. Verwyder van die hitte en roer die res van die likeur in.
  3. Klits die room en vanielje in ’n skoon bak tot die room net begin verdik.
  4. Giet die afgekoelde gelatienmengsel by terwyl jy aanhou klits. Klits verder tot sagte punte begin vorm.
  5. Vou die neute in en giet die mengsel in die voorbereide vorm of bak. Bedek met kleefplastiek en plaas sowat 2 uur in die yskas tot gestol.
  6. BOTTERKARAMELSOUS Verhit die suiker en water sowat 8 minute in ’n kastrol oor matige hitte sonder om dit te roer. Die suiker moet amberkleurig word. Draai die kastrol af en toe om egalige verkleuring te verseker – die mengsel mag nooit geroer word nie.
  7. Verwyder van die hitte sodra die suiker die gewenste kleur bereik en roer die room en botter versigtig by. Wees versigtig dat dit nie spat nie. Draai die kastrol tot die sous dik en glad is. Laat afkoel tot louwarm.
  8. Keer die charlotte op ’n bord uit, verwyder die plastiek en skep die sous oor – die sous kan ook apart voorgesit word. Versier met die kruisementblare en sit dadelik voor.