Plaas ’n oop, vol bierblikkie halfpad in die holte van die hoender, wat regop gehou word deur die blikkie, en braai oor die kole.

Suurlemoen en knoffel gee die vleis ekstra geur. Verkieslik sal jy die hoender in ’n ketelbraai (met ’n deksel) gaarmaak, maar dit werk ook as jy dit met ’n tinfoeliedeksel toemaak op ’n oop vuur. (Anders kan jy dit in die

bakoond druk.)

Genoeg vir 4 mense

Bereiding: 5 minute

Gaarmaaktyd: 1½ uur

Hittegraad: medium

SUURLEMOENKNOFFELOLIE

500 ml (2 k) kanola-olie

4-6 knoffelhuisies

1 suurlemoen, in skywe gesny

KNOFFELPASTA

1 bol knoffel, skoongemaak en huisies gekneus

5 takkies (10 ml) pietersielie

10 ml (2 t) growwe sout

10 ml (2 t) olyfolie

HOENDER

1 heel hoender

1 blikkie (340 ml) bier

sout en peper

SUURLEMOENKNOFFELOLIE

Meng al die bestanddele saam en laat staan dit vir minstens ’n dag sodat die geur kan ontwikkel.

KNOFFELPASTA

Meng al die bestanddele vir die knoffelpasta saam en vryf oor die hoender. Laat staan vir sowat ’n uur.

HOENDER

Maak die hoender op ’n oopgemaakte blikkie bier staan en plaas op ’n rooster hoog bo matige kole. Bedruip van tyd tot tyd met die suurlemoenknoffelolie. Bedek ná 30 minute met ’n deksel gemaak van ’n dubbele laag tinfoelie as jy oor ’n oop vuur braai. Geur met sout en peper en sit voor met suurlemoenpiekel.