Lewer 3-4 porsies.

Dis nie eers ryk nie want die sous word gemaak met jogurt en nie room nie.

4 hoenderborsies, ontvel en ontbeen

30 ml (2 e) olyfolie

sout en varsgemaalde swartpeper

1 knoffelhuisie, fyngedruk

150 ml witwyn

150 ml hoenderaftreksel

2 takkies vars roosmaryn

180 ml (¾ k) romerige Griekse jogurt

15 ml (1 e) mielieblom

80 g bloukaas, gekrummel

Sny die hoenderborsies in stukkies.

Verhit die olie in ‘n pan en braai die hoender tot net-net goudbruin, geur liggies met sout en peper en skep uit.

Roerbraai die knoffelhuisie effens en giet die wyn en aftreksel in die pan.

Voeg die roosmaryn by en verhit tot kookpunt.

Kook af tot een derde van die sous oor is.

Verwyder die roosmaryntakkies.

Meng ongeveer 30 ml (2 e) jogurt met die mielieblom en maak aan tot ’n pasta.

Meng met die res van die jogurt.

Hou eenkant.

Plaas die hoenderstukkies terug in die pan en voeg die jogurtmengsel asook die bloukaas by.

Geur na smaak met sout en peper.

Verhit oor lae hitte tot die sous net kook, die hoender gaar is en die kaas gesmelt is.

Sit voor met gekookte baba-aartappels en slaai.

Wenk: Moet nooit hoenderborsies oorgaar maak nie. Braai dit tot die vleis net-net wit verkleur en nie meer pienk is nie. Dit moet egter nog sappig wees – as jy dit te lank gaarmaak, word dit wurgdroog.