Vrugtekoek bak kan ’n gedoente wees. As jou tyd beperk is, maak dié bakmengsel aan en bak ’n vrugtebrood wanneer jy reeds met vakansie is. Dis nou nie heeltemal die ware Jakob nie, maar is darem makliker. Die resep kom van Gonny Wills van Allensnek, Roodepoort.

vrugtekoek Lewer 1 koekbrood Bereidingstyd: 15 minute Baktyd: 1 uur BAKMENGSEL

  • 500 ml (2 k) koekmeel
  • 250 ml (1 k) suiker
  • 10 ml (2 t) bakpoeier
  • 7 ml (1½ t) fyn kaneel
  • 2 ml (½ t) fyn naeltjies
  • 2 ml (½ t) neutmuskaat
  • 5 ml (1 t) fyn gemmer
  • 5 ml (1 t) sout
  • 250 ml (1 k) vrugtekoekmengsel
  • 100 g rooi glanskersies, gehalveer
VIR BAK
  • 125 ml (½ k) melk
  • 80 ml (1/3 k) olie
  • 2 eiers
METODE

  1. Vir die bakmengsel:  Meng alles baie goed en bêre in ’n lugdigte houer in die koskas.
  2. Vir bak: Voorverhit die oond tot 180 °C. voer ’n broodpan van 9 x 19 cm met bakpapier uit en spuit met kossproei.
  3. Skep die mengsel in ’n mengbak. Klits die melk, olie en eiers saam en voeg by die bakmengsel. meng goed en giet in die voorbereide broodpan.
  4. Bak sowat 1 uur of tot ’n toetspen skoon uit die brood kom. Laat effens afkoel in die pan en keer dan op ’n draadrak uit om heeltemal af te koel.