Lewer sowat 30 rolletjies

Bereiding: sowat 30 minute

Staantyd: sowat 1 uur

Baktyd: sowat 15 minute

sowat 500 g brooddeeg

100 ml sagte bruinsuiker

125 ml (½ k) rosyne

3 ml fyn kaneel

1 ml wonderpeper

30 g botter, gesmelt

½ k versiersuiker, 2 t suurlemoensap

en 2 t kookwater vir die sous

Voorverhit die oond tot 180 °C en smeer ’n groot bakplaat.

  1. Laat die deeg sowat 20 minute rys en knie dit op ’n meelbestrooide werkoppervlak af.
  2. Rol die deeg in ’n groot reghoek (sowat 20 x 45 cm) uit en versprei die bruinsuiker, rosyne, kaneel en wonderpeper oor die uitgerolde oppervlak.
  3. Rol die deeg in die lengte op (soos ’n rolkoek) en sny dit in stukke van sowat 1 cm dik.
  4. Pak die rolletjies op die gesmeerde bakplaat en laat rys sowat 20 minute.
  5. Smeer die rolletjies met botter en bak 15 minute of tot gaar.
  6. Meng die sousbestanddele en drup dit bo-oor.