Spesiaal vir Braaidag môre deel ons dié heerlike resep vir skenkel-sampioenpot uit Huisgenoot se nuwe Braai-tydskrif.

SkenkelpotMAIN
Genoeg vir 4-6 mense

Bereiding: 15 minute

Marineertyd: oornag

Gaarmaaktyd: 2-2½ uur

Bestanddele:

2 kg lamskenkels, met lang bene of in stukke gesaag

30 ml (2 e) olyfolie

30 ml (2 e) balsemieke asyn

paar takkies roosmaryn

10 heel knoffelhuisies, geskil

1 pakkie (20 g) droësampioene

500 ml (2 k) lam- of groenteaftreksel

sout en peper

1 bos preie, gekap

botter en olyfolie

250-500 ml (1-2 k) witwyn

1 kg verskeidenheid sampioene

125 ml (½ k) gekapte pietersielie

1 suurlemoen se gerasperde skil

pasta, kapokaartappel of vars gebakte brood vir voorsit

Metode:

  1. Besprinkel die lamskenkels met die olyfolie en asyn. Voeg die roosmaryn en knoffel by en laat oornag marineer.
  2. Verwyder die vleis uit die marinade en hou die marinade eenkant.
  3. Week die droësampioene in die aftreksel tot sag en hou eenkant. Hou ook die aftreksel eenkant.
  4. Geur intussen die skenkels met die sout en peper en braai dit in ’n swartpot saam met die preie in botter en olyfolie tot goudbruin.
  5. Voeg die marinade, wyn, aftreksel en ge-weekte droësampioene by en laat prut 2-2½ uur tot die vleis sag is.
  6. Braai die verskeidenheid sampioene in ’n mengsel van olie en botter tot net sag. Voeg by die skenkelpot en meng deur.
  7. Sprinkel die pietersielie en gerasperde suurlemoenskil oor.
  8. Sit voor op pasta of kapokaartappel of saam met vars gebakte brood.

Kry nog inspirasie en byderwetse resepte (plus van die lekkerste resepte uit die TV-program Kom Ons Braai op VIA, DStv-kanaal 147) in Huisgenoot Beste Resepte: Braai. Dis nou te koop teen R45.